O‘zbekiston milliy terma jamoasi bosh murabbiyi Fabio Kannavaro Jahon chempionati oldidan muxlislar, Italiyadagi kayfiyat va turnirning asosiy favoritlari haqida o‘z fikrlari bilan o‘rtoqlashdi. Italiyalik mutaxassisning aytishicha, u mundial vaqtida nafaqat o‘zbekistonlik, balki italiyalik muxlislardan ham qo‘llab-quvvatlov kutadi.
Kannavaro Italiya terma jamoasi Jahon chempionatida ishtirok etmayotgan bir paytda, italiyalik futbol ishqibozlari turli jamoalarni qo‘llab-quvvatlashi mumkinligini ta’kidladi. Uning fikricha, kimdir Karlo Anchelotti sabab Braziliyaga muxlislik qilishi, yana kimdir Vinchenso Montella tufayli Turkiyani qo‘llab-quvvatlashi tabiiy.
“Umid qilamanki, Italiya xalqi va italiyalik muxlislar ham bizni qo‘llab-quvvatlaydi. Ayrim italiyaliklar Karlo Anchelotti sabab Braziliyaga muxlislik qilishi mumkin, yana ba’zilar Vinchenso Montella tufayli Turkiyani qo‘llab-quvvatlaydi. Lekin o‘ylaymanki, ko‘plab hamyurtlarim aynan O‘zbekiston terma jamoasiga muxlislik qiladi”, — dedi Kannavaro.
Bu so‘zlar O‘zbekiston terma jamoasi uchun iliq ma’noga ega. Chunki Kannavaro nafaqat murabbiy sifatida, balki Italiya futbolida katta obro‘ga ega shaxs sifatida ham jamoamizga qo‘shimcha e’tibor olib kelmoqda. Uning boshchiligida O‘zbekistonning ilk mundialiga tayyorgarlik ko‘rishi xalqaro maydonda ham qiziqish uyg‘otmoqda.
Mutaxassis Jahon chempionatining asosiy favoritlari haqida ham fikr bildirdi. Kannavaro turnirda eng kuchli da’vogar sifatida Fransiya terma jamoasini tilga oldi. Uning fikricha, fransuzlar tarkib, tajriba va individual mahorat nuqtayi nazaridan juda jiddiy imkoniyatga ega.
“Asosiy favorit sifatida Fransiyani aytgan bo‘lardim. Shuningdek, Portugaliya, Argentina va Ispaniya terma jamoalari ham katta imkoniyatga ega. Bundan tashqari, kuchli tarkibga ega Angliyani ham esdan chiqarmaslik kerak”, — dedi u.
Kannavaro tilga olgan jamoalar haqiqatan ham mundialda katta maqsadlar bilan ishtirok etadi. Fransiya so‘nggi yillarda jahon futbolida eng barqaror termalardan biriga aylangan. Portugaliyada yulduzlar avlodi shakllangan, Argentina esa katta turnirlarda doimo xavfli raqib bo‘lib kelgan. Ispaniya o‘zining texnik futboli bilan, Angliya esa kuchli tarkibi va yuqori sur’ati bilan ajralib turadi.
O‘zbekiston uchun esa bu mundial tarixiy ahamiyatga ega. Ilk bor Jahon chempionatida ishtirok etish — katta sharaf, katta mas’uliyat va katta imkoniyat. Kannavaro ham futbolchilarga ortiqcha bosim emas, ishonch va zavq bilan o‘ynash ruhini berishni istamoqda.
Italiyalik murabbiyning fikrlari shuni ko‘rsatmoqdaki, u turnirga real qaraydi: favoritlar bor, kuchli raqiblar bor, ammo O‘zbekiston ham maydonga o‘z so‘zini aytish uchun chiqadi. Mundialda nomlar emas, o‘sha kunigi xarakter, tayyorgarlik va ishonch hal qiluvchi bo‘ladi. Endi navbat — katta sahnada o‘z imkoniyatimizni ko‘rsatishga.
“Zamin”ni Telegramʻda oʻqing!
