Sunʼiy intellekt bozorining jadal oʻsishi kutilmagan muammolarni yuzaga keltirdi. NAND-xotira va qattiq disklar (HDD) taqchilligi tufayli yuqori sigʻimli saqlash qurilmalari narxi baʼzi joylarda uch baravargacha oshib ketdi. Bu holat ayniqsa Internet Archive kabi raqamli merosni saqlash bilan shugʻullanuvchi tashkilotlarga ogʻir taʼsir koʻrsatmoqda. Bu haqda Ixbt.com xabar beradi.
Internet Archive hozirda 210 petabaytga yaqin maʼlumotni saqlaydi va har kuni oʻz arxivini 100 terabaytga boyitib boradi. Biroq, tashkilot asoschisi Bryuster Keylning taʼkidlashicha, 28–30 TB sigʻimli disklarni topish juda qiyinlashgan. Mavjudlari esa odatdagidan ancha qimmat narxda sotilmoqda.
Wikimedia Foundation ham xuddi shunday qiyinchiliklarga duch kelmoqda. Tashkilot vakillari nafaqat xotira qurilmalari, balki serverlar yetkazib berishdagi uzilishlar va kelajakdagi xaridlarni rejalashtirishdagi noaniqliklar haqida xavotir bildirmoqda.
Qoʻshimcha muammo sifatida veb-saytlar tomonidan botlarga qoʻyilayotgan cheklovlarni keltirish mumkin. Sayt egalari oʻz maʼlumotlari sunʼiy intellekt modellarini oʻqitish uchun ruxsatsiz yigʻilishidan qoʻrqib, barcha turdagi botlarni, jumladan, raqamli tarixni saqlashga xizmat qiluvchi foydali botlarni ham bloklamoqda.
Natijada, arxiv loyihalari ham qimmatlashgan uskunalar, ham maʼlumotlarga kirishdagi texnik toʻsiqlar tufayli jiddiy inqirozga yuz tutmoqda. Bu holat internetdagi maʼlumotlar xavfsizligi va kelajak avlod uchun raqamli xotirani saqlab qolish imkoniyatlarini cheklab qoʻymoqda.
“Zamin”ni Telegramʻda oʻqing!
