NVIDIA kompaniyasi bozor qiymati 5,5 trillion dollardan oshgan tarixdagi ilk ommaviy kompaniyaga aylandi. 13-may kungi savdolarda sunʼiy intellekt chiplari ishlab chiqaruvchisining aksiyalari qariyb 3 foizga oʻsib, jahon fond bozorida mutlaq rekord oʻrnatdi. Bu haqda Ixbt.com xabar beradi.
Oʻsishga NVIDIA rahbari Jensen Huangning AQSH prezidenti Donald Trumpning Xitoyga tashrifi doirasidagi delegatsiyaga qoʻshilishi haqidagi xabarlar turtki boʻldi. Investorlar ushbu tashrif doirasida Xitoy rahbari Si Tszinpin bilan boʻlib oʻtadigan muzokaralardan ijobiy natijalar kutmoqda.
Hozirgi vaqtda NVIDIA bozor qiymati boʻyicha Google (4,7 trillion dollar) va Apple (4,3 trillion dollar) kabi texnologik gigantlardan yaqqol ustunlik qilmoqda. Kompaniya aksiyalari bir oy ichida 20 foizga, yillik hisobda esa 74 foizga oʻsdi.
Jensen Huangning shaxsiy boyligi ham 5,4 milliard dollarga koʻpayib, 196 milliard dollarga yetdi. Bu uni dunyoning eng boy insonlari qatoriga, Mark Zuckerberg va Larry Ellison bilan bir qatorga olib chiqdi.
Bozor ishtirokchilari sunʼiy intellekt infratuzilmasiga boʻlgan talab yanada oshishini taxmin qilmoqda. Meta kabi yirik IT-kompaniyalarning AI sohasiga milliardlab dollar sarmoya kiritishi NVIDIA mahsulotlariga boʻlgan talabni taʼminlovchi asosiy omil boʻlib qolmoqda.
“Zamin”ni Telegramʻda oʻqing!
