Тошкент шаҳар ҳокимлиги пойтахтда кузатилаётган ноқулай об-ҳаво шароити муносабати билан аҳоли ва шаҳар меҳмонларини эҳтиёткор бўлишга чақирди. Қайд этилишича, шамолнинг кескин кучайиши айрим хавфли ҳолатларга сабаб бўлиши мумкин.
Маълум қилинишича, кучли шамол таъсирида электр узатиш тармоқларида узилишлар юзага келиши эҳтимоли мавжуд. Шунингдек, йирик дарахтлар ёки шох-шаббаларнинг қулаши ҳолатлари ҳам кузатилиши мумкин. Бу эса нафақат транспорт воситалари, балки пиёдалар учун ҳам жиддий хавф туғдиради.
Мутахассислар бундай об-ҳаво шароитида эҳтиёткорлик чораларини кучайтиришни тавсия этмоқда. Хусусан, ҳайдовчиларга автомобилларини дарахтлар, баннерлар ва электр линиялари остида қолдирмаслик маслаҳат берилмоқда. Пиёдалар эса имкони борича очиқ ҳудудларда узоқ вақт қолмасликлари, ҳаракатланишда эътиборли бўлишлари керак.
Фавқулодда вазиятлар юзага келган тақдирда тезкор хизматларга мурожаат қилиш учун 112 ва 1055 рақамлари ишлаб турибди. Қайд этилишича, шаҳар коммунал ва тезкор хизматлари кучайтирилган тартибда фаолият олиб бормоқда ва вазиятни назоратга олган.
“Zamin”ни Telegram'да ўқинг!
