18:28 / 17.11.2022

Украинадаги урушнинг 266-куни: Херсонда топилган қийноқ камераси, Чорнобайивкада истило излари (фото)

Украина қуролли кучлари Россиянинг 15 ноябр кунги ҳужумлари вақтида украин шаҳарлари бўйлаб юзга яқин ракета учирилганини маълум қилишди. Украина энергетика вазири Герман Галушченко буни «уруш бошидан буён энергетика инфратузилмаларига қилинган энг кенг кўламли ҳужум» деб атади.

Украина ҳарбийлари АҚШ ва иттифоқчиларга 15 ноябр куни Полшада ракета қулаган жойга яқин ҳудудда россияликлар ракетасини тўсишга урингани ҳақида маълумот беришган.

АҚШ якуний хулоса қандай бўлмасин, Полша ҳудудига ракета қулаши учун Россияни жавобгар деб билишини маълум қилди. РФ ТИВ россиялик ҳарбийлар ушбу ҳодисага алоқадорлигини буткул рад этмоқда. Украина хавфсизлик хизмати Херсонда рус ҳарбийлари томонидан шаҳарни оккупация қилиш вақтида фойдаланилган «қийноқ камералари» топилганини даъво қилмоқда.

«Русь сидящая» инсон ҳуқуқлари лойиҳаси асосчиси Олга Романова хабар беришича, «Вагнер» гуруҳи аъзолари камида 40 нафар уруш қатнашчисини судсиз қатл қилган.

Қуйида 16 ноябр, урушнинг 266-кунида Украинанинг турли ҳудудларида олинган суратлар.

Россияликларнинг Чорнобайивкада ташлаб кетилган позицияси

^{Чорнобайивка аэропорти ҳудудида қолган РФ армиясининг яксон этилган ҳарбий техникаси. Чорнобайивка — россиялик ҳарбийлар ташлаб чиққан Херсондан 11 километр ғарбда жойлашган. Чорнобайивкада аэропорт борлиги туфайли, қишлоқ РФ армияси учун стратегик аҳамиятга эга бўлган. 24 феврал куниёқ Россия аэропорт бўйлаб зарбалар берган, уч кун ўтиб уни эгаллаб олган. Шундан кейин Украина қуролли кучлари мунтазам равишда аэропортни ўққа тутишди — президент офиси маслаҳатчиси Алексей Арестович маълумотига кўра, 10 июлгача украин қўшини бу ҳудудга 26 бор ҳужум уюштирган. 11 ноябр куни Украина қуролли кучлари Чорнобайивкани озод этишди, 14 ноябр куни Украина қишлоқ Россия томонидан ўққа тутилганини маълум қилди. Фото: Valentyn Ogirenko / Reuters / Scanpix / LETA}

^{Россия ҳарбийларининг Чорнобайивка аэродромида қолдириб кетган ҳарбий техникаси. Украина армияси Россиянинг Чорнобайивкадаги позициясига мунтазам равишда ва муваффақиятли зарбалар берган — бу ҳақда интернетда мемлар ҳам пайдо бўлганди.
Valentyn Ogirenko / Reuters / Scanpix / LETA}

^{Россия ҳарбийларининг Чорнобайивка аэродромида вайрон қилинган позицияси
Valentyn Ogirenko / Reuters / Scanpix / LETA}

^{Россиялик аскарлар ўғирлаган музлаткичлар аэропорт ҳудудида
Valentyn Ogirenko / Reuters / Scanpix / LETA}

^{Украин ҳарбийлари аэродром ҳудудида топган инсон скелети
Valentyn Ogirenko / Reuters / Scanpix / LETA}

^{РФ армия томонидан фойдаланилган артиллерия снарядлари
Valentyn Ogirenko / Reuters / Scanpix / LETA}
Херсондаги гуманитар вазият

^{11 ноябр куни озод этилган Херсон аҳолиси шаҳар бош майдонида гуманитар ёрдам тарқатилишини кутмоқда. Херсонда сув қувури ва дарёнинг ўнг соҳилини таъминлаб келган йирик электр станция вайрон қилинган, шу туфайли шаҳарда электр ва ичимлик суви, шунингдек алоқа билан боғлиқ муаммолар кузатилмоқда. Фото: Oleg Petrasyuk / EPA / Scanpix / LETA}

^{Егулик учун навбатда турган херсонликлар
Valentyn Ogirenko / Reuters / Scanpix / LETA}

^{Шаҳар аҳолиси Днепрдан сув олмоқда
Oleg Petrasyuk / EPA / Scanpix / LETA}

^{Херсон аҳолиси шаҳар марказий майдонида селфи қилмоқда
Chris McGrath / Getty Images}

^{Сув учун навбатда турган херсонликлар
Paula Bronstein / Getty Images}

^{Херсонлик кекса ёшли аёл ўз уйида шам ёқмоқда
Paula Bronstein / Getty Images}
Херсондаги қийноқлар қўлланган қамоқхона

^{Украина хавфсизлик хизмати 16 ноябр куни Херсонда россиялик ҳарбийлар фойдаланган изоляторда «қийноқ камера»си топилгани ҳақида хабар берди. «Херсонликлар сўроқ қилинган ва шафқатсизларча қийноққа солинган. Қийноқ камераларини кўздан кечириш чоғида ҳуқуқ-тартибот органлари ходимлари қийноқ изларидан дарак берувчи буюмларни топишди», дейилади идора хабарида. Фото: Chris McGrath / Getty Images}

^{Оператор Украина томони талқинига кўра, россиялик ҳарбийлар Херсон аҳолиси вакилларини қийноқларга солган қамоқхонани тасвирга олмоқда. Деворда «Слава России!!! Слава Путину!!! Слава Шойгу!!!» ёзуви
Murad Sezer / Reuters / Scanpix / LETA}