Германия 100 нафар ўзбекистонлик мутахассисни ишга жалб қилади

Германиянинг Шимолий Рейн-Вестфалия федерал ерининг Гелзенкирхен, Харзевинкел ва Эссен шаҳарларида Ўзбекистон элчихонаси томонидан қатор учрашувлар ўтказилди, деб хабар бермоқда “Дунё”.

Германиядаги йирик Dachser Group логистика компаниясининг мамлакатимизда ваколатхонасини очиш, ThyssenKrupp Uhde GmbH компанияси билан “Ўзкимёсаноат” ўртасида янги турдаги кимё маҳсулотлари ишлаб чиқариш бўйича ҳамкорликни йўлга қўйиш юзасидан фикр алмашилди.

Томонлар ATC Trade Center GmbH савдо компанияси билан ҳамкорликда учинчи давлатларга қиймати 10 миллион АҚШ долларига тенг маҳаллий кимё маҳсулотлар экспортини йўлга қўйиш масаласини ишлаб чиқиш, 2024 йил март ойида Top travel GmbH сайёҳлик компанияси билан ҳамкорликда ушбу минтақадаги 100 дан ортиқ туркомпаниялари учун мамлакатни мазкур йўналишдаги салоҳиятини намойиш этишга бағишланган тадбир ташкил этишга келишиб олди.

Шимолий Рейн-Вестфалия иқтисодиёт, саноат, иқлимни муҳофаза қилиш ва энергетика вазирлиги билан биргаликда минтақа компаниялари эҳтиёжидан келиб чиқиб, мамлакатдан 100 нафар мутахассисларни жалб қилиш борасида қўшма пилот-лойиҳани ишлаб чиқиш тўғрисида ҳам келишувга эришилди.

Шухрат Раззаков

«ЗАМИН.УЗ» муҳаррири