Москвада икки шоир урушга қарши шеърлари учун судланди

Москванинг Твер туман суди «Маяковский ўқишлари» шеърий кечалари иштирокчилари, шоирлар Артем Камардин ва Егор Штовбани узоқ муддатга озодликдан маҳрум қилди. «Новая газета - Европа»нинг мухбири хабар беришича, Камардин етти йилга, Штовба эса беш ярим йилга қамалган.

«Новая-Европа» қайд этишича, суд 33 ёшли Камардин ва 23 ёшли Штовбани «ЛХР» ва «ДХР» қуролли тузилмалари аъзоларига қарши адоват қўзғатишда, шунингдек, давлат хавфсизлигига қарши қаратилган фаолиятга чақириқларда айбдор деб топди. «Медиазона» хабарига кўра, Камардин 500 минг рубл жаримага ҳам тортилган, қарорни судя Ксения Панова қабул қилган.

Судланувчиларнинг тарафдорлари «Маяковский иши | Камардин, Дайнеко, Штовба» Telegram-каналида аниқлик киритишича, ҳукм эълон қилинганидан кейин баъзи эшитувчилар, хусусан, Артем Камардиннинг рафиқаси Александра Попова «Уят!» деб бақирган. Шундан сўнг у ва яна бир неча киши суд залида ушланган. Журналистларга дохил қўлга олишлар суд олдидаги кўчада давом этди. Бироз вақт ўтгач, мухбирлар автозакдан чиқариб юборилди.

Донбасс ҳақидаги шеър учун етти йил қамоқ

2022 йил 25 сентябрда Камардин ва Штовба Москвадаги Триумфалная майдонида шоир Владимир Маяковский ҳайкали ёнида бўлиб ўтган «Маяковский ўқишлари» шеър кечаларида иштирок этди. Камардин Донбасс ҳақидаги шеърларни ўқиди. Бунинг эртасига у полиция ходимлари томонидан қўлга олинган, калтакланган ва унинг сўзларига кўра, зўрланган, шундан сўнг у камера олдида кечирим сўрашга мажбур бўлган. Кўп ўтмай, хавфсизлик кучларига яқин бўлган «112» Telegram-каналида узр сўралган видео пайдо бўлди.

Дастлаб Камардин ва Штовбага нисбатан «ЛХР» ва «ДХР» қуролли тузилмалари аъзоларини камситганлик учун иш очилган, деб ёзади «Медиазона». 2023 йил март ойида айблов давлатга қарши фаолиятга чақириш ҳақидаги моддага ўзгартирилган. Камардиннинг жинояти шундан иборатки, шеърида чақирув қоғозларини олмаслик ва улар асосида ҳарбий комиссарликка бормасликни тавсия қилган. Штовбани унинг шериги деб аталган.

Иш бўйича учинчи айбланувчи - шоир Николай Дайнеко май ойида тўрт йиллик қамоқ жазосига ҳукм қилинган эди. «Мемориал» инсон ҳуқуқлари маркази жамоаси ҳар учала шоирни - «Маяковский иши» иштирокчисини сиёсий маҳбуслар рўйхатига киритди.