Ҳусийлар Қизил денгизда илк бор АҚШ кемасига ҳужум қилди

^{Фото: AP Photo}

Яманнинг шимолий ва марказий қисмини бошқарадиган “Ансор Аллоҳ” (ҳусийлар) ҳаракати Қизил денгизда илк бор АҚШ кемасига ҳужум қилди. Бу ҳақда “РИА Новости” хабар берди.

АҚШ ҳарбий-денгиз кучлари 31 декабрь куни ҳусийларга ҳужум қилганидан кейин Яман ҳусийлари Қизил денгизда АҚШ кемасига биринчи ҳужумни амалга оширган.

“Қодир Яратганининг ёрдами билан Яман қуролли кучларининг денгиз кучлари, ракета кучлари ва дрон авиациясияси кўп сонли баллистик ва кемага қарши ракета, дронлардан фойдаланган ҳолда қўшма ҳарбий операция ўтказди ва сионистик тузумнинг кемаларини қўллаб-қувватлайдиган Америка кемасига зарба берди”, — дейди ҳусийлар қуролли кучлари вакили Яҳё Сариа.

Унинг сўзларига кўра, мазкур операция “31 декабрь, якшанба куни ҳусийларнинг ҳарбий-денгиз кучлари Америка кучлари томонидан уюштирилган ҳужумга биринчи жавоб бўлди.

“Яман қуролли кучлари мамлакатимиз, халқимиз ва миллатимизни қонуний ҳимоя қилиш ҳуқуқи доирасида барча душман таҳдидларига жавоб беришдан тортинмайди”, — деб таъкидлади ҳусий қуролли кучлари вакили.

Таъкидланишича, Яман қуролли кучлари Ғазо секторидаги блокада бекор қилинмагунча, Араб ва Қизил денгизлардаги босиб олинган Фаластин портларига йўл олган Исроил ёки Исроил билан боғлиқ кемаларнинг ўтишига тўсқинлик қилишда давом этади.