Пенсилваниядаги митинг чоғида Трампни отишди. Илк реакциялар

^{Anna Moneymaker / Getty Images / AFP / Scanpix / LETA}
АҚШнинг собиқ президенти, республикачилар партиясининг навбатдаги сайловлар учун номзоди Доналд Трамп суиқасдга учради.

У Пенсилваниянинг Батлер шаҳридаги тарафдорлари иштирокидаги митингда мигрантлар мавзусида нутқ сўзлаётганида ўт очилган. У дарҳол чиқишини тўхтатиб, трибуна ортига яширинган ва кўп ўтмай қўриқчилар қуршовида саҳнани тарк этган. Кетаётганида сиёсатчи қўлларини мушт қилиб кўтарган ҳолатда тушган сурат ижтимоий тармоқларда кенг тарқалмоқда.

Видеокадрларда Трампнинг ўнг қулоғи қонга беланганини кўриш мумкин.

Бу ҳодиса республикачилар партиясидан президентликка номзоднинг Пенсилвания штати, Батлер шаҳрида ўз тарафдорлари қаршисида чиқиши чоғида рўй берди - бу штат ноябр ойидаги сайловлардаги энг муҳим иккиланувчи штат ҳисобланади.

Трампнинг ортида тарафдорлари плакатлар кўтарган ҳолда туришганди. Отишма бошланганида улар ҳам жонини сақлашга уриниб, яширинишган.

Сўнгги маълумотларга кўра, мерган ўлдирилган, унинг шахси номаълум, митингга келганлардан бир киши ҳалок бўлиб, икки киши оғир тан жароҳатлари олишган.

Ҳар икки партия вакиллари ҳамда жаҳондаги сиёсатчилар Трампни қўллаб-қувватловчи ва сиёсий зўравонликни қораловчи баёнотлар беришмоқда.

Жо Байден
АҚШ президенти
Менга Пенсилванияда Доналд Трампни қўллаб-қувватлаш учун ўтказилган митингда отишма рўй берганини хабар қилишди. Мен у хавфсизликда экани ва ўзини яхши ҳис қилаётганини эшитишдан мамнунман. Мен у ва унинг оиласи, шунингдек митингда бўлганлар учун дуодамиз, бу борада қўшимча маълумот кутяпмиз. Жилл ва мен Махфий хизматдан уни [Трампни] хавфсиз жойга олиб ўтишганидан миннатдормиз. Америкада бундай зўравонликка ўрин йўқ. Биз буни қоралаш учун бир миллат сифатида бирлашишимиз лозим.

Бинямин Нетаняҳу
Исроил бош вазири
[Рафиқам] Сара ва мен президент Трампга очиқчасига ҳужумдан карахт ҳолатга тушдик. Биз унинг хавфсизлиги ва тез орада соғайиши учун ибодат қиламиз.

Виктор Орбан
Венгрия бош вазири
Бу зулматли кунларда менинг ўй-хаёлларим ва дуоларим президент Трамп билан.

Барак Обама
АҚШнинг собиқ президенти
Бизнинг демократиямизда сиёсий зўравонликка мутлақо ўрин йўқ. Ҳали нима бўлмаганини аниқ билмасак-да, биз барчамиз собиқ президент Трамп жиддий жароҳатланмаганидан енгил тортишимиз ва шу вазиятдан сиёсатимизга содиқлигимизни тасдиқлаш учун фойдаланишимиз керак. Мишел ва мен унга тез орада соғайиб кетишини тилайман.

Нэнси Пелоси
Вакиллар палатасининг собиқ спикери
Оиласи сиёсий зўравонлик қурбони бўлган одам сифатида мен жамиятимизда сиёсий зўравонликнинг ҳар қандай турига ўрин йўқлигини биламан. Мен собиқ президент Трамп хавфсизликда эканидан Худога шукр айтаман. Ҳали бу қўрқинчли ҳодиса тафсилотларини билмаймиз, келинг собиқ президентнинг бугунги митингида бўлганларнинг барчаси омон бўлиши учун дуо қиламиз.

Жорж Буш
АҚШнинг собиқ президенти
Биз Лора билан президент Трамп ўз ҳаётига қилинган қўрқоқларча суиқасддан кейин хавфсизликда эканидан шукрона айтамиз. Ва биз тезкор ҳаракатлари учун Махфий хизматдаги йигитлар ва аёллардан миннатдормиз.

Жоржиа Мелони
Италия бош вазири
Мен унга [Трампга] ҳамдардлик билдираман ва тез орада соғайишини тилайман, умид қиламанки, сайловолди кампаниясининг кейинги ойларида мулоқот ва масъулият нафрат ва зўравонликдан устун келади.

Камала Ҳаррис
АҚШ вице-президенти
Биз Даг билан у жиддий жароҳат олмаганидан хурсандмиз. Биз у, унинг оиласи ва бу маъносиз отишмадан жабрланганларнинг барчаси учун дуодамиз. Биз ходимлари тезкор реакция кўрсатгани учун АҚШ Махфий хизматига ҳамда зудлик билан чора кўрганлари учун маҳаллий расмийларга миннатдорчилик билдирамиз. Мамлакатимизда бундай зўравонликка ўрин йўқ. Биз барчамиз бу жирканч ҳаракатни қоралашимиз ва у навбатдаги зўравонлик ҳолатларига олиб келмаслиги учун қўлимиздан келганини қилишимиз лозим.

Билл Клинтон
АҚШнинг собиқ президенти
Америкада, айниқса сиёсий жараёнларда зўравонликка ўрин йўқ. Биз Ҳиллари билан президент Трамп хавфсизликда эканидан хотиржам бўлдик, Пенсилваниядаги бугунги митингда уюштирилган ҳужумдан жабрланганларга ҳамдардлик билдирамиз ва АҚШ Махфий хизматининг оператив ҳаракатларидан миннатдормиз.

Кир Стармер
Буюк Британия бош вазири
Мен президент Трамп митингидаги шокка солувчи манзарадан даҳшатга тушдим ва биз унга ва унинг оиласига энг яхши тилакларимизни билдирамиз. Бизнинг жамиятимизда ҳар қандай шаклдаги сиёсий зўравонликка жой йўқ, менинг ўй-хаёлларим ушбу ҳужум жабрланувчилари билан.

Энтони Блинкен
АҚШ Давлат котиби
Мен собиқ президент Трампнинг митингидаги отишмадан ҳайрат ва қайғудаман, у хавфсизликда эканига шукрона келтираман. Байден айтганидек, Америкада сиёсий зўравонликка ўрин йўқ ва биз барчамиз буни қоралашимиз даркор.

Илон Маск
SpaceX асосчиси
Мен президент Трампни тўлиқ қўллаб-қувватлайман ва унинг тез орада соғайиб кетишига умид қиламан.

Ллойд Остин
Пентагон раҳбари
Бутун мудофаа вазирлиги демократиямизда ўрин йўқ бўлган мазкур зўравонликни қоралайди. Биз Америкадаги келишмовчиликни бундай ҳал қилолмаймиз ва ҳеч қачон бундай бўлмаслиги керак. Мен собиқ президент Трамп хавфсизликда эканидан хабар топиб, енгил тортдим ва у, унинг оиласи ҳамда бу даҳшатли воқеада жабрланганларнинг барчаси учун дуодаман.

Бутун дунёда сиёсатчиларга суиқасдлар сони ортиб бормоқда

Экспертлар сўнгги вақтларда бутун дунё бўйлаб сиёсий суиқасдларга уринишлар ва ўлим билан таҳдид солиш ҳолатлари ортганини қайд этишади.

Ўтган йили Эквадор президентлигига номзод Фернандо Вилявисенсио Китода ўлдирилганди.

Аргентина вице-президенти Кристина Фернандес де Киршнер ҳам суиқасдга учраган — аммо у билан боғлиқ ҳолатда ёлланма қотилнинг тўппончаси отилмай қолганди.

Япония бош вазири Синдзо Абэ қўлбола қурол орқали отиб ўлдирилган.

Жорий йил бошида эса Жануби Кореядаги мухолифат етакчиси Ли Жэ Мен бўйнидан яраланган, баҳорда эса Словакия бош вазири Роберт Фицо суиқасдни бошдан кечирганди.

АҚШда сўнгги вақтларда бу каби ҳолатлар кузатилмаганди, аммо америкалик юқори мартабали мулозимларга таҳдидлар сони ортиб бормоқда.

New York Times нашри хабарига кўра, ўтган йили полициячилар Конгресс аъзолари манзилига келиб тушган саккиз мингдан ортиқ таҳдидларни текширган, бундай таҳдидлар федерал судяларга нисбатан ҳам билдирилган.

Ўтган йил октябрида америкаликларнинг тўртдан бир қисми «ватанпарварлар мамлакатни қутқариш учун зўравонликка қўл уришига ҳам тўғри келади» деб ҳисоблаши маълум бўлганди (бу шундай сўровлар ўтказилган сўнгги уч йил давомидаги энг юқори кўрсаткич эди). “Замин” янгиликларини “Twitter”да кузатиб боринг