Зимбабведа ўлим жазоси расман бекор қилинди

^{Эммерсон Мнангагва Фото: Владимир Смирнов/ ТАСС}
Зимбабве президенти Эммерсон Мнангагва ўлим жазосини бекор қилиш тўғрисидаги қонунни имзоланди, деб хабар беради Euronews.

Янги қонун нафақат жиноятчиларни ўлимга ҳукм этишни тақиқлайди, балки судларга олий жазога ҳукм қилинган барча маҳбусларнинг ишларини қайта кўриб чиқиш мажбуриятини ҳам юклайди. Ҳисоб-китобларга кўра, ҳозирда мамлакатда 60 га яқин маҳбус ўлимга ҳукм қилинган. Ушбу жазо тури ўрнига умрбод қамоқ жазоси ва узоқ муддатга озодликдан маҳрум этиш каби жазолар қўлланади.

Қайд этилишича, Зимбабведа ўлим жазоси охирги марта 2005 йилда ижро этилган. Мнангагва ҳокимият тепасига келганидан кейин бир неча бор ўз президентлик ваколатларидан фойдаланган ҳолда ўлимга ҳукм қилинганлар жазосини умрбод қамоқ жазосига ўзгартирган.

Мамлакатнинг амалдаги президентининг ўзи 1960 йилларда, Зимбабве мустақиллиги учун уруш даврида поездни портлатгани учун ўлимга ҳукм қилинган, аммо кейинроқ жазо 10 йиллик қамоқ муддатига ўзгартирилган.

Кения, Либерия ва Гана каби Африка давлатлари ҳам яқинда ўлим жазосини бекор қилиш йўналишида «ижобий қадамларни» ташлаган, аммо улар бу борадаги қонунни қабул қилганича йўқ.

Amnesty International маълумотларига кўра, дунёнинг 113 та давлатида ўлим жазоси бекор қилинган. 2023 йилда дунё бўйлаб 1,2 минг киши қалт этилган — уларнинг аксарияти Эрон ва Саудия Арабистони ҳисобига тўғри келади. Ундан кейинги ўринларда Сомали ва АҚШ турибди. “Замин” янгиликларини “Twitter”да кузатиб боринг