Германиянинг бўлажак канцлери Трамп ва Вэнсни провакацияда айблади

Украина президенти Володимир Зеленскийнинг Вашингтонга ташрифи вақтида содир бўлган тортишув АҚШ раҳбарияти томонидан олдиндан режалаштирилган, дейди Германиянинг бўлажак канцлери Фридрих Мерц.

«Ўйлашимча, Овал кабинетдаги ушбу учрашувда Зеленскийнинг сўзларига муносабат ўз-ўзидан эмасди, балки режалаштирилган провакация эди», — дейди немис сиёсатчиси. Мерцнинг таъкидлашича, у учрашув видеоёзувини бир неча бор кўриб чиққан ва «суҳбат оҳангидан ҳайратга тушган». Унинг фикрича, буларнинг барчаси «ҳеч қандай фойда келтирмаган».

Шу билан бирга, Мерцнинг қўшимча қилишича, бу каби риторика АҚШнинг янги маъмуриятини умумий хатти-ҳаракатларига мос келади. «Вашингтонда кузатган нарсамиз сўнгги бир неча ҳафта ичида содир бўлган бир қатор воқеалар, жумладан, Америка делегациясининг Мюнхендаги хавфсизлик конференциясида қатнашишида маълум бир изчиллик бор», — дейди у. Зеленский ва Трампнинг баҳси 28 феврал куни журналистлар олдида юз берди. У АҚШ вице-президенти Жей Ди Вэнснинг урушни дипломатик йўл билан ҳал этиш учун Владимир Путинга нисбатан муносабатни юмшатиш борасидаги баёнотидан кейин бошланди. Зеленский Россия президенти билан ўйнашишга қарши чиқиб, у бир неча бор тузилган битимларни бузганини эслатиб ўтди.

Бунга жавобан Трамп ва Вэнс Зеленскийни танқид қилиб, уни урушни давом эттирмоқчиликда ва Америка томонига ҳурматсизликда айблади. Натижада учрашув тортишувга айланиб кетди ва Украина президенти Оқ уйни фойдали қазилмалар бўйича битимни имзоламасдан муддатидан олдин тарк этишига мажбур бўлди.

Шундан сўнг кўплаб ғарб ОАВ Зеленскийга нисбатан провокация ҳақида ёзди. The New York Times колумнисти, уч карра Пулитцер мукофоти лауреати Томес Фридман бу «олдиндан режалаштирилган тузоқ» бўлганини таъкидлади. Financial Times мақоласида «Зеленский камситилиш учун тузоққа туширилгани» ҳақида сўз боради. The Atlantic журнали таҳлилчиси, АҚШ Ҳарбий-денгиз коллежининг фахрий профессори Том Николс эса тортишувнинг юзага келишида Вэнсни айблаб, у «ток-шоудаги модератор ролини ўйганини» қайд этди. Мақолада вице-президент «жиддий вақтларда ўзининг аҳамиятини кўрсатиб қўйишга уринаётган ишончсиз инсон» сифатида таърифланган.

Полша собиқ президенти ва тинчлик бўйича Нобел мукофоти лауреати Лех Валенса Трампни танқид қилди — у АҚШ президентига мактуб йўлади. «Украина президенти Володимир Зеленский билан мулоқотингизни даҳшат ва жирканиш билан кузатдик. Украина Россияга қарши урушда АҚШ кўрсаётган моддий ёрдам учун миннатдор бўлиши керак дея кутаётганингиз ҳақоратли. Озод дунё қадриятларини ҳимоя қилиб, ўз қонини тўкаётган қаҳрамон украин аскарларига миннатдорчилик билдирилиши керак», — деб ёзади Валенса.

Оқ уй Зеленскийнинг кечирим сўрашини кутмоқда. АҚШ давлат котиби Марко Рубио шу каби чақириқ билан чиқиш қилиб, Украина президенти «дипломатия ишламаётгани тўғрисида маъруза ўқимаслиги» кераклигини таъкидлади. Зеленскийнинг ўзи Киев ва Вашингтон муносабатларини сақлаб қолиш мумкинлигини маълум қилди, аммо кечирим сўрамади. Давлат раҳбари, шунингдек, АҚШ билан нодир металлар бўйича битимни имзолашга ва урушни дипломатик йўл билан ҳал этишга ўтишга тайёрлигини билдирди. “Замин” янгиликларини “Telegram”да кузатиб боринг