Хитойда кимё заводида даҳшатли портлаш содир бўлди!

Хитойнинг Шандун провинциясида 27 май куни туш вақтида мудҳиш портлаш юз берди. Портлаш сабабли осмонни ўраб олган улкан оловли шар пайдо бўлиб, унинг ортидан қора тутундан иборат устунлар кўкка кўтарилди. Бу ҳақда South China Morning Post нашри хабар бермоқда.

Маҳаллий манбаларга кўра, воқеа Гаоми шаҳар уъездида жойлашган Shandong Youdao Chemical кимёвий корхонасида юз берган. Завод 2019 йилда ташкил этилган бўлиб, пестицидлар, турли фармацевтик воситалар ва бошқа кимёвий маҳсулотларни ишлаб чиқариш билан шуғулланади. Ҳозирги вақтда мазкур корхонада 300 дан ортиқ мутахассис ишлаётгани маълум қилинган. Эътиборлиси, Shandong Youdao Chemical хлорпирифос пестицидини ишлаб чиқариш бўйича дунёдаги энг йирик заводлардан бири ҳисобланади.

Портлашнинг кучли бўлганлиги шундан маълумки, атрофдаги бир нечта уйларнинг деразалари синган. Маҳаллий аҳоли воқеа жойида бўлган қўрқинчли ҳолат ва портлашдан сўнг ҳосил бўлган кучли тебранишни айтиб бермоқда. Аҳоли ва гувоҳларнинг таъкидлашича, портлаш кучидан баъзи биноларда деворларга зарар етган, кўплаб уйларнинг ойналари синган ва яқин атрофдаги инсонлар кучли қўрқувга тушган.

Хитой марказий телевидениеси (CCTV) ҳам воқеани тасдиқлаб, ҳозирги вақтда ҳудудда фавқулодда ҳолат эълон қилинганини маълум қилди. Шу билан бирга, портлаш оқибатида жароҳат олганлар сони ҳақида аниқ маълумотлар ҳали эълон қилинмаган ва ходиса сабаблари ҳам ҳозирча номаълум бўлиб турибди. Айни пайтда, фавқулодда вазиятлар ва тиббий ёрдам хизматлари воқеа жойида тезкор тарзда иш олиб бормоқда.

Маҳаллий ҳукумат ва корхона раҳбарияти портлаш оқибатларини бартараф этиш учун барча куч ва воситалар сафарбар этилганини таъкидламоқда. Воқеанинг сабабини аниқлаш мақсадида махсус комиссия тузилган ва текширув ишлари бошлаб юборилган.

Портлаш содир бўлган корхонанинг ишлаб чиқариш қуввати юқори даражада эканлиги сабабли, атроф-муҳитга қандай зарар етгани ҳам кенг жамоатчиликнинг қизиқишини орттирмоқда. Чунки мазкур заводда ишлаб чиқариладиган кимёвий моддалар инсон саломатлиги ва экологик барқарорлик учун жиддий хавф туғдириши мумкин.

Экспертлар фикрича, бундай кучли портлаш заводнинг хавфсизлик талабларига қанчалик риоя қилиб келганини ҳам савол остида қолдирмоқда. Эндиликда бу ҳодиса Хитойдаги бошқа кимё саноати корхоналарини ҳам хавфсизлик чораларини қайта кўриб чиқишга мажбур қилиши эҳтимоли юқори.

Шандун провинцияси Хитойнинг энг йирик саноат марказларидан бири бўлиб, кимё саноати соҳасида ҳам муҳим ўрин тутади. Бу ерда юз берган портлаш келгуси кунларда бутун мамлакат бўйлаб саноат хавфсизлиги масаласини янада кучли муҳокама қилинишига сабаб бўлиши мумкин.

Ҳозирда маҳаллий аҳоли воқеанинг сабаблари ва оқибатлари ҳақида тезроқ маълумот олишга интиқ бўлиб турибди. Ҳукумат вакиллари эса тез орада бу ҳақда расмий баёнот беришларини маълум қилганлар.

Умид қиламизки, содир бўлган воқеа сабабли зарар кўрганлар сони минимал даражада бўлиб, фавқулодда вазият тез орада бартараф этилади ва бундай ҳолатларнинг олдини олиш бўйича самарали чора-тадбирлар ишлаб чиқилади. «Замин»ни Telegram’да ўқинг!