Жирафалар ҳақида янги кашфиёт: улар эндиликда тўрт турга ажратилди

Кўп йиллар давомида биология фанидан хабардор мутахассислар жирафаларни фақат битта тур ва унга кирувчи тўққизта кичик тоифа сифатида таснифлаб келган эди. Олимлар узоқ вақт давомида жирафалар ўртасида катта тафовут йўқ, улар бир тур доирасида турли ҳудудларга мослашган деб ҳисоблашарди.

Бироқ замонавий илм-фан, хусусан генетик таҳлиллар ва бош суяклари тузилишини чуқур ўрганиш натижалари бу қарашларни тубдан инкор қилди. Илмий изланишлар шуни кўрсатдики, жирафалар ўртасидаги фарқлар шунчалик каттаки, уларни бир тур деб эмас, балки алоҳида турлар сифатида қайд этиш зарур.

Охирги ўн йил ичида Африканинг турли ҳудудларидан — Нигер чўлларидан тортиб Жанубий Судан саванналаригача йиғилган намуналар ўрганилди. Улар устидан олиб борилган мукаммал таҳлиллар илмий жамоатчиликни янги хулосага олиб келди: жирафалар аслида тўртта мустақил турга мансуб.

Эндиликда улар қуйидагича ажратилди:

– Масаи жирафаси — асосан Танзания, Кения ва Угандада тарқалган;

– Шимолий жирафа — Жанубий Судандан Эфиопия ҳудудларигача учрайди, учта кичик турга бўлинади;

– Тўрсимон жирафа — Кения, Эфиопия ва Сомали саванналарида яшайди;

– Жанубий жирафа — Намибия, Жанубий Африка, Ботсвана ва қўшни давлатларда кенг тарқалган.