АҚШ раҳбари Доналд Трамп яқин вақтларда Россия президенти Владимир Путин билан мулоқот ўтказиш истагини билдирди. 5 сентябрь, жума куни Оқ уйда ташкил этилган матбуот анжуманида Трамп: «Ҳа, бунга тайёрман. Биз аввал ҳам самарали суҳбат қилганмиз», дея таъкидлади.
Шу билан бирга, Россия президентининг матбуот котиби Дмитрий Песков Кремлда ҳозирча икки давлат етакчилари ўртасида «телефон мулоқоти уюштириш» бўйича аниқ режа йўқлигини маълум қилди. Бироқ у бундай суҳбатни «зарурат бўлса, қисқа фурсатда ташкил этиш мумкин»лигини қайд этди, деб хабар тарқатди «Интерфакс».
Аввалроқ Трамп Украина президенти Володимир Зеленский ҳамда «кўнгиллилар коалицияси» вакиллари билан телефон орқали мулоқот қилган эди. Бу суҳбат Украина раҳбарининг Париж сафари чоғида бўлиб ўтган ва Киев учун хавфсизлик кафолатлари муҳокама қилингани маълум қилинди.
Reuters маълумотига кўра, бир соат давом этган мулоқот чоғида АҚШ президенти Европа етакчиларини Россия нефтини сотиб олишни тўхтатишга чақирган. Шунингдек, Трамп Хитойнинг Россиянинг Украинадаги ҳарбий ҳаракатларига молиявий кўмак кўрсатаётгани ҳақида гапириб, унга иқтисодий босим ўтказиш зарурлигини таъкидлаган.
Бу каби баёнотлар глобал сиёсат майдонида янги қарама-қаршиликлар ва ташаббуслар учун замин яратиши мумкинлиги айтилмоқда.
«Замин»ни Telegram’да ўқинг!
