Қирғизистон собиқ раҳбари Алмазбек Атамбаевнинг оила аъзолари Қўйтош қишлоғидаги хонадонидаги тураржойдан куч ишлатиш орқали чиқарилди. Бу ҳақда «Интерфакс» агентлиги хабарида айтиб ўтилди.
Собиқ президентнинг қизи Алия Шагиеванинг маълумот беришича, уйга баъзилари милиция формасида, баъзилари эса оддий кийимдаги шахслар келган ва эшикни бузиб очиб киришган. Уларнинг ҳеч бири расмий ҳужжат тақдим этмаган.
Қирғизистон Давлат мулкини бошқариш агентлиги тушунтиришича, Атамбаевнинг Қўйтошдаги уйи жойлашган ер суд қарорига асосан давлат мулки сифатида қайтарилган. Ҳокимият бу ҳудудда қариялар уйи ва болалар боғчасини қуришни режалаштирмоқда.
Эслатиб ўтамиз, жорий йилнинг 3 июнида Бишкек шаҳри Первомайск туман суди Алмазбек Атамбаевни сиртдан 11 йил 6 ойга озодликдан маҳрум этиш ҳақида қарор чиқарган ва унинг мол-мулкини мусодара қилган эди.
Собиқ президентга қатор оғир айбловлар қўйилган: коррупция билан шуғуллангани, оммавий тартибсизликларни ташкил этгани ва Қўйтош қишлоғидаги ер майдонларини ноқонуний тарзда ўзлаштиргани суд томонидан тасдиқланган.
Шу тариқа, Атамбаев оиласи истиқомат қилган уй давлат ихтиёрига ўтиб, эндиликда ижтимоий аҳамиятга эга янги иншоотлар қурилиши учун хизмат қилади.
«Замин»ни Telegram’да ўқинг!
