Россия президенти Владимир Путиннинг таъкидлашича, дунёда ядровий қуролланиш бўйича кураш амалда бошланиб бўлган. У бу ҳақда 10 октябрь куни Тожикистонга амалий ташрифи якунларидан кейин бўлиб ўтган матбуот анжуманида гапирди.
“Аслида, айтиш мумкинки, маълум бир ядровий пойга бошланди. Ҳозирда турли давлатлар бу йўналишда фаол ҳаракат қилмоқда”, — деди Путин.
Россия раҳбари, шунингдек, мамлакатда янги авлод қуролларининг ишлаб чиқилиши ҳақида тўхталиб ўтди.
“Ўйлайманки, яқин вақтларда биз бир неча йил аввал эълон қилган янги қуроллар ҳақида маълумот бериш имкониятига эгамиз. Улар синов босқичидан ўтмоқда ва натижалар умидбахшдир”, — дея қўшимча қилди у.
Путиннинг сўзларига кўра, агар Қўшма Штатлар стратегик ҳужумкор қуролларни қисқартириш бўйича битимни узайтиришдан бош тортса, бу Россия учун ҳал қилувчи омил бўлмайди. У Россиянинг ядровий тўхтатувчи салоҳияти ҳозирда дунёдаги энг юқори даражада эканини таъкидлади.
Сентябр ойи охирида Россия президенти Хавфсизлик кенгаши йиғилишида Вашингтон ҳам худди шундай қарор чиқарса, Москва шартнома қоидаларига яна бир йил амал қилишга тайёрлигини билдирган эди. Шу билан бирга, Путин ядровий қуролларни тўғридан-тўғри чекловчи охирги халқаро келишув муддати якунланиши билан у кучини йўқотишига урғу берди.
Кейинчалик АҚШ президенти Доналд Трамп Оқ уйда журналистлар билан учрашувда Путиннинг бу таклифини “яхши ғоя” деб баҳолади, бироқ бу борада қўшимча маълумот беришни ёки изоҳ бериб ўтишни маъқул кўрмади.
Шу тариқа, ядровий қуроллар борасидаги тортишув яна бир бор жаҳон сиёсий майдонида асосий мавзуга айланди — ҳар бир давлат ўз хавфсизлик чегарасини аниқ белгилашга уринмоқда.
“Zamin”ни Telegram'да ўқинг!
