Путин Рамзан Қодировни навбатдаги орден билан тақдирлади

^{Фото: «ТАСС»}
Чеченистон раҳбари Рамзан Қодиров III даражали «Ватан олдидаги хизматлари учун» ордени билан тақдирланди. Бу ҳақда Чеченистон миллий сиёсат, ташқи алоқалар, матбуот ва ахборот вазири Аҳмад Дудаевга таяниб, «РБК» хабар берди.

Дудаев бу мукофотни улуғ ва муҳим аҳамиятга эга деб атади. Унинг сўзларига кўра, Қодиров ушбу орденни Чеченистоннинг ижтимоий-иқтисодий ривожланишига қўшган улкан ҳиссаси ва кўп йиллик виждонли меҳнати учун олган.

Дудаевнинг таъкидлашича, тегишли фармонни Россия президенти Владимир Путин имзолаган. Ҳужжат расмий ахборот порталида ҳали эълон қилинмаган.

2006 йилда Қодиров IV даражали «Ватан олдидаги хизматлари учун» ордени билан тақдирланган эди. Шунингдек, у Жасорат (2003) ва Шараф (2015) орденлари , II даражали «Ҳарбий жасорати учун» медали (2000) ва Аҳмад Қодиров номидаги Чеченистон ордени (2005) билан тақдирланган. 2006 йилда у Россия Қаҳрамони унвонини олди. Бундан ташқари, Қодиров «Чеченистон Республикасида хизмат кўрсатган жисмоний маданият ходими» (2003) ва «Чеченистон Республикасида хизмат кўрсатган бунёдкор» (2006) фахрий унвонларига эга.

2020 йилнинг 23 июлида Путин Қодировга Россия гвардияси генерал майори унвонини берганди. Тақдирлашдан бир неча кун олдин АҚШ Давлат департаменти уни қора рўйхатга киритган, Чеченистон раҳбари ва унинг оила аъзоларига мамлакатга киришни тақиқлаган эди.

Чеченистонда 17—19 сентябрь кунлари бўлиб ўтган сайловларда Қодиров республика раҳбари этиб қайта сайланди ва тўплаган овозлари сони бўйича жаҳон рекордини янгилади: у 99,7 фоиз овоз олган. Қодиров 2011 йил 5 апрелдан Чеченистонни бошқариб келади. Бунгача у ҳудуд ҳукумати раиси ва республика президенти бўлган. “Замин” янгиликларини “Одноклассники”да кузатиб боринг