Ўзбекистонда қимматбаҳо металлар бозорида муҳим янгилик қайд этилди. Илк бор Марказий банк олтин қуймаларини қайта сотиб олиш бўйича расмий нархларни очиқ эълон қилди. Бу қарор инвесторлар ва аҳоли учун бозордаги қоидаларни янада аниқ ва шаффоф қилади.
Маълум қилинишича, қадоғи бут ҳолатда сақланган олтин қуймалар банклар томонидан сотув нархидан 3,9 фоиз арзонроқ нархда қабул қилинади. Агар қуйма техник талабларга тўлиқ жавоб бермаса, унинг қайтариб олиш баҳоси 4,9 фоизга паст бўлади.
Бугунги кунда 100 граммлик олтин қуймани банкларга 167 миллион 910 минг сўмга қайтариб сотиш мумкин. Таqqослаш учун, айнан шу қуйма бир йил аввал 116,6 миллион сўмдан сотувга чиқарилган эди. Натижада инвесторлар учун соф даромад қарийб 44 фоизни ташкил этмоқда.
Аввалроқ ҳам олтин қуймаларини банкларга 1–4 фоиз чегарасида қайтариб сотиш имкони мавжуд эди. Бироқ аниқ нархлар очиқ манбаларда эълон қилинмагани сабабли, кўпчилик учун бозор шароити ноаниқ бўлиб келган.
Мутахассислар таъкидлашича, 2025 йил бошидан бери олтин нархининг 49 марта ошиши мамлакат ички бозорида қимматбаҳо металларга бўлган қизиқиш ва талаб кескин ўсганини кўрсатади. Янги очиқланган нархлар эса олтинни ишончли инвестиция воситаси сифатида танлаётганлар учун янада қулай шароит яратиши кутилмоқда.
“Zamin”ни Telegram'да ўқинг!
