Ўзбекистон терма жамоасининг собиқ бош мураббийи Тимур Кападзе яқинда Ўзбекистон Миллий ахборот агентлигига катта интервью берди. У суҳбат давомида терма жамоадаги лавозимини тарк этиш қарори, келажак режалари ва жамоа билан ўтган вақт ҳақида очиқ гапирди, деб хабар берди UzA.
Кападзе суҳбат аввалида раҳбариятга миннатдорчилик изҳор этди:
“Менга ишониб, бу лавозимни таклиф қилганлари учун раҳбариятга катта раҳмат. Бу вақт ичида ҳам мутахассислар, ҳам мухлислар ишончини оқлаш учун бор кучимни бердим. Энг муҳими, биз Жаҳон чемпионатига йўл олишга муваффақ бўлдик — бу мен учун катта ифтихор”, — деди у.
Мураббийнинг сўзларига кўра, янги бош мураббий тайинланганидан сўнг у жамоада қисқа вақт ёрдамчи сифатида қолишга рози бўлган, лекин кейин ўз йўли билан кетишни маъқул кўрган:
“Мен раҳбариятга айтганман: янги мураббий келса, унга икки йиғин давомида мослашишга ёрдам бераман, кейин эса ўз фаолиятимни давом эттираман. Улар ҳам бу фикрни қўллаб-қувватлашди”.
Тимур Кападзе ҳозирда бир неча таклифларни кўриб чиқмоқда:
“Айни пайтда менга яхши вариантлар бор. Ҳали қарор қилмадим, лекин қаерда бўлсам ҳам ўз устида ишлашни давом эттираман”, — деди у ишонч билан.
Жаҳон чемпионати ва Каннаваро билан муносабат ҳақида
Журналистлар унинг Жаҳон чемпионатида қатнашиш режаси ҳақида ҳам сўрашди. Кападзе бу саволга шундай жавоб берди:
“Албатта, ҳар бир мураббий дунё чемпионатида ишлашни орзу қилади. Фабио Каннаваро билан бир штабда бўлишим мумкин эди, аммо узоқ ўйлаб, қолмасликка қарор қилдим. Агар мен қолганимда ҳам, у ҳам ўзини ноқулай ҳис қиларди. Ҳар бир мураббийнинг ўз услуби, фикри ва ғояси бор. Менда ҳам шундай”.
Янги мақсадлар ва келажак режалар
Кападзе терма жамоадан кетган бўлса-да, фаолиятини давом эттириш нияти қатъий:
“Ҳозирги кунда ҳам терма жамоада қолиш имкони бор эди, аммо менда ўз ғояларим бор. Янги тажрибалар орттириш, билимни ошириш ниятидаман”, — дея таъкидлади у.
Терма жамоадаги фаолиятни баҳолади
Кападзе миллий жамоа билан 10 ой ичида катта натижаларга эришганини эслатиб ўтди:
“Фақат миллий терма эмас, Олимпия терма жамоаси билан ҳам 4 йил давомида ишладик. Натижада Жаҳон чемпионатига ҳам, Олимпиадага ҳам чиқдик. Бунинг ўзи катта ғалаба. Мухлислар ва раҳбарият олдида юзимиз ёруғ бўлди”, — деди у фахр билан.
Қайси ўйинлар эсда қолгани ҳақида
“Жамоани қишда қабул қилганимда олдимизда муҳим баҳслар турган эди. Вақтимиз жуда оз бўлганига қарамай, асосий мақсад натижа эди. Терма жамоада илгари ўйнаган, ёрдамчи бўлган одам сифатида бу вазифани масъулият билан қабул қилдим”, — деб эслади Кападзе.
Ўзбекистоннинг Жаҳон чемпионатидаги имкониятлари ҳақида
“Қуръа ҳам катта аҳамиятга эга, лекин мен ишонаман — жамоамиз гуруҳдан чиқишга қодир. Футболчиларнинг салоҳияти ва жамоавий руҳи бунга етарли”, — деди у умид билан.
Келгуси йўналиш ҳақида
Журналист сўнгги савол сифатида Кападзега: агар у Суперлига клубини бошқарса, қандай талаблар қўяр эди, деб сўради.
Мураббий бу саволга шундай жавоб берди:
“Мен учун клубнинг мақсади муҳим. Агар режа аниқ бўлса, иш ҳам қизиқарли кечади. Барча нарса ният ва мақсадга боғлиқ”.
Тимур Кападзе суҳбат охирида Ўзбекистон терма жамоасига Жаҳон чемпионатида омад тилади. Унинг сўзларига кўра, бу жамоа ҳақиқатан ҳам тарих яратиш салоҳиятига эга ва у доим юрт термасининг ютуқларидан фахрланишини таъкидлади.
“Zamin”ни Telegram'да ўқинг!
