Аргентина футболи атрофида жиддий шов-шув кўтарилди. “La Nacion” нашри тарқатган маълумотларга кўра, мамлакат терма жамоаси 2026 йилги Жаҳон чемпионатида иштирок этиш ҳуқуқидан маҳрум бўлиши эҳтимоли пайдо бўлди. Сабаб — Аргентина футбол ассоциацияси (АФА) доирасидаги кенг қамровли коррупция иши.
Манбаларга асослансак, тергов марказида АФА президенти Клаудио Тапиа, унинг яқин ишончли шахси Пабло Товигиньо ҳамда молия бўлими раҳбари ўринбосари Лусиано Накис турибди. Суд органлари Пилар шаҳри ҳудудида жойлашган 10 гектарлик йирик мулк, вертолёт қўниш майдончаси, от фермаси ва унда сақланаётган 50 дан ортиқ винтаже автомобиллар қонуний манбалар ҳисобидан олинган-олинмаганини ўрганмоқда.
Нашр таъкидлашича, агар мазкур иш суд муҳокамасига чиқиб, давлат органларининг футбол федерацияси фаолиятига ноқонуний аралашуви тасдиқланса, ФИФА қаттиқ чора кўриши мумкин. Бу эса амалда жаҳон чемпиони бўлган Аргентина терма жамоасининг мундиалдан четлатилишига олиб келиши эҳтимолини кучайтиради.
Маълумотларга қараганда, ҳуқуқни муҳофаза қилувчи органлар аввалроқ АФА биносида, шунингдек, мамлакат бўйлаб 13 та футбол клубида рейдлар ўтказган. Терговчилар клублар пул ювиш ва ноқонуний молиявий операцияларда иштирок этган бўлиши мумкин, деган гумонни илгари сурмоқда.
Айниқса, “Sur Finanzas” компанияси билан боғлиқ ҳолатлар диққат марказида. Ушбу компания клубларга кредитлар ажратгани, кейин эса телевидение ва маркетинг ҳуқуқлари орқали тўловларни қайтариб олгани тахмин қилинмоқда. Қизиғи шундаки, компания АФА раҳбари Тапианинг яқин дўсти Ариел Валлежога тегишли экани айтилмоқда.
Ҳозирча расмий қарор қабул қилинмаган. Бироқ тергов чуқурлашиб бораётгани, иш халқаро майдонга чиқиши эҳтимоли юқорилигини кўрсатмоқда. Агар айбловлар исботланса, футбол оламида катта шок юзага келиши аниқ — чунки гап нафақат алоҳида шахслар, балки бутун бир жаҳон чемпиони бўлган терма жамоанинг тақдири ҳақида кетмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
