«Наполи» бош мураббийи Антонио Конте жамоа ҳужумчиси Ромелу Лукакунинг ҳаракатларидан норозилигини очиқчасига билдирди. Мураббийнинг сўзларига кўра, белгиялик футболчи клуб қароргоҳига келган бўлса-да, мураббий билан кўришишни лозим топмаган. Бу ҳақда Goal.com хабар беради.
Лукаку узоқ муддатли жароҳатидан сўнг Белгияда реабилитация курсини ўтаб қайтган эди. У Италияга келиб клуб раҳбарияти билан учрашган, бироқ Конте билан юзма-юз гаплашиш учун унинг хонасига кирмаган.
Бу ҳолат мураббий ва футболчи ўртасидаги яқин муносабатларга путур етказиши мумкин.
«Директорларимиздан бири у билан гаплашганини биламан, у машғулот базасига келди, менинг хонам эса ўша ерда эди. Лекин ҳеч ким эшикни тақиллатмади.
Мен ундан салом ёки хабар кутган эдим, бу мени жуда хафа қилди», — деди Конте матбуот анжуманида.
Конте ҳар доим футболчиларни тушунишга ҳаракат қилишини, бироқ ўйинчилар мураббийни тушуниш учун ҳаракат қилмаётганини таъкидлади. Август ойидан бери жароҳати сабаб бор-йўғи етти ўйинда майдонга тушган Лукаку ҳозирда спорт формасини тиклаш устида ишламоқда.
Ҳужумчининг «Наполи» билан шартномаси келаси мавсум охирида якунига етади. У 2026 йилги жаҳон чемпионатида Бельгия терма жамоаси сафида иштирок этиш учун тезроқ майдонга қайтишни ва ўз даражасини исботлашни мақсад қилган.
“Zamin”ни Telegram'да ўқинг!
