Реал Мадрид ва Испания терма жамоаси афсонаси Сергио Ramоснинг Sevilla клубини сотиб олиш бўйича музокаралари кутилмаганда тўхтатилди. Собиқ ҳимоячи ва унинг инвестиция гуруҳи томонидан таклиф қилинган маблағ миқдори кескин камайтирилгани сабабли, Андалусия клуби эгалари келишувдан воз кечишга қарор қилишди. Бу ҳақда Goal.com хабар беради.
Эл Десмарқуе нашрининг хабар беришича, икки ҳафта олдин томонлар 440 миллион евролик келишув бўйича ният мактубини имзолашган эди. Дастлабки режага кўра, ушбу маблағнинг 80 миллиони устав капиталини оширишга, 290 миллиони акциядорларга ва қолган қисми клубнинг соф қарзларини ёпишга йўналтирилиши керак эди. Бироқ, чоршанба кунги учрашувда вазият тубдан ўзгариб кетди.
Сергио Ramос музокаралар столига янги вакил — мексикалик инвесторлар манфаатини ҳимоя қилувчи нуфузли ҳуқуқшунос Роберто Альварес билан келди. Янги консорциум клубнинг умумий қийматини икки бараварга камайтириб, 220 миллион евролик янги таклифни илгари сурди. Ушбу янги шартларга кўра, гуруҳ 120 миллион евро эвазига клубнинг 42 фоиз назорат пакетига эга бўлишни кўзлаган эди.
Sevilla раҳбарияти ушбу таклифни клуб келажаги учун мутлақо қабул қилиб бўлмас деб ҳисоблади ва музокараларни бир томонлама тўхтатди. Маълум бўлишича, Ramоснинг янги таклифи ҳатто директорлар кенгаши аввалроқ рад этган бошқа инвесторларнинг таклифидан ҳам пастроқ бўлиб чиққан. Беш ой давом этган мураккаб музокаралар натижасиз якунланди.
Ҳозирда Sevilla молиявий ҳолатни барқарорлаштириш учун зудлик билан янги инвесторлар қидирмоқда. Клуб устав капиталини ошириши шарт бўлгани сабабли, раҳбарият бошқа қизиқиш билдираётган томонлар билан янги мулоқотларни бошлашга тайёрланмоқда.
“Zamin”ни Telegram'да ўқинг!
