Италиянинг Милан жамоаси Массимилиано Аллегри ўрнига янги бош мураббий излаш жараёнида кутилмаган номзодга эътибор қаратди. Сан Сиро раҳбарияти Кристал Пелас клубининг собиқ устози Оливер Гласнер билан учрашув белгилади. Австриялик мутахассис Англия Премер-лигасидаги муваффақиятли фаолиятидан сўнг Россонери шорт-листида биринчи ўринга кўтарилиб олди. Бу ҳақда Goal.com хабар беради.
Даилй Маил нашрининг хабар беришича, Милан раҳбарияти клубни қайта қуриш ва А Серияда яна доминант кучга айланиш учун айнан Гласнер номзодини маъқул кўрмоқда. 51 ёшли мураббийнинг тактик мослашувчанлиги ва совринлар ютиш борасидаги тажрибаси клуб эгаларида катта таассурот қолдирган.
Оливер Гласнер Кристал Пелас бошқарувида ажойиб натижаларни қайд этди. У Лондон клуби билан Англия кубоги, Англия Суперкубоги ва Конференциялар лигасида ғолиб чиқиб, тарихий натижага эришди. Катта олтиликка кирмайдиган жамоа билан бундай муваффақиятларга эришиш унинг нуфузини Европа миқёсида кескин ошириб юборди.
Шунингдек, Милан техник бўлим бошқарувига Манчестер Юнайтед собиқ мураббийи Ралф Рангникк номзодини ҳам кўриб чиқмоқда. Рангникк ва Гласнер ўртасидаги ўтмишдаги ҳамкорлик (Ред Булл Салзбург давридаги) клубнинг янги стратегик лойиҳаси учун пойдевор бўлиши кутилмоқда. Ҳозирда томонлар ўртасидаги музокаралар ҳал қилувчи паллага кирган.
“Zamin”ни Telegram'да ўқинг!
