Google компанияси ўзининг машҳур қидирув тизимини сунъий интеллект ёрдамида бутунлай янгилади. Бу ўзгариш сўнгги 25 йил ичида қидирув тизими учун амалга оширилган энг катта янгиланиш бўлиб, анъанавий "ўнта кўк ҳавола" даври ўз ниҳоясига етганини англатади. Эндиликда фойдаланувчилар оддий ҳаволалар рўйхати ўрнига сунъий интеллект томонидан яратилган интерактив жавобларни олишади. Бу ҳақда Techcrunch.com хабар беради.
Янги тизим фойдаланувчиларнинг мураккаб ва батафсил сўровларини тушунишга қодир. Google қидирув ойнаси энди суҳбат шаклидаги саволларга мослашади ва автоматик тарзда таклифлар беради. AI Овервиевс функцияси орқали фойдаланувчилар қидирув натижалари бўйича қўшимча саволлар беришлари ва мавзуни чуқурроқ ўрганишлари мумкин.
Шунингдек, Google "ахборот агентлари" (информатион агентс) тушунчасини жорий этмоқда. Ушбу воситалар фойдаланувчи номидан интернетдаги маълумотларни кузатиб боради ва керакли ўзгаришлар ҳақида хабар беради. Масалан, агентлар бозор тенденцияларини ёки маълум бир янгиликларни 24/7 режимида назорат қилиб, фойдаланувчига автоматик тарзда ҳисобот тақдим этиши мумкин.
Ушбу янгиликлар фойдаланувчиларнинг анъанавий веб-сайтларга ўтиш вақтини сезиларли даражада қисқартиради. Google ўзининг қидирув тизимини шунчаки маълумотлар базаси эмас, балки фойдаланувчи эҳтиёжларига мослашадиган ақлли ёрдамчига айлантиришни мақсад қилган. Янги функциялар ёз ойларидан бошлаб босқичма-босқич барча фойдаланувчилар учун очиқ бўлади.
“Zamin”ни Telegram'да ўқинг!
