Andijonda yangi pullik yo‘l quriladi

Andijon viloyati hokimligi Xitoylik investorlar bilan hamkorlikda yangi pullik avtomobil yo‘li qurish bo‘yicha kelishuvga erishdi. Ushbu yo‘l Yangi Andijon va Xonobod shaharlarini bog‘laydi.

Kelishuv 3-noyabr kuni viloyat hokimi Shuhrat Abdurahmonov va kompaniya vakillari o‘rtasida o‘tkazilgan uchrashuvda imzolandi. Avval ommaga e’lon qilinmagan ushbu loyiha mamlakatda pullik magistral yo‘llar tarmog‘ini rivojlantirish milliy strategiyasining bir qismi bo‘ladi.

Loyiha sentyabr oyida qabul qilingan “Avtomobil yo‘llari to‘g‘risida”gi qonunning yangi tahriri asosida amalga oshirilmoqda. Ushbu hujjat bunday loyihalarga huquqiy asos yaratib, pullik yo‘llar uchun bepul alternativ yo‘l va iqtisodiy jihatdan asoslangan tariflar mavjud bo‘lishini talab qiladi.

Yangi yo‘l “Yangi Andijon” deb nomlangan keng qamrovli shaharsozlik loyihasini to‘ldiradi. Ushbu loyihaga Bobur nomini berish taklif etilmoqda.

Loyihada 250 million dollar hajmidagi moliyalashtirish asosida yirik ta’lim va madaniyat markazi barpo etish rejalashtirilgan. Yangi Andijon – Xonobod yo‘nalishi hukumat tomonidan tasdiqlangan pullik yo‘llar ro‘yxatiga kiritiladi.

Ushbu ro‘yxatga Toshkent – Samarqand, Toshkent – Andijon yo‘nalishlari hamda Taxtaqoracha dovonida pullik tunnel qurilishi kabilar kiradi. Tashabbus transport infratuzilmasini modernizatsiya qilish va hududlarga xorijiy investitsiyalarni jalb qilishga qaratilgan.

Zamonaviy tushunchadagi birinchi pullik yo‘l XVII asrda Buyuk Britaniyada paydo bo‘lgan. 1663-yilda qabul qilingan parlament qonuni mahalliy hokimiyatlarga Shimoliy Buyuk yo‘lning bir qismi uchun yo‘l haqini undirish va uni saqlash huquqini bergan.

“Zamin”ni Telegramʻda oʻqing!