Yangi Ekologik Nizom Tasdiqlandi
Joriy yil 28 noyabrdagi 750-sonli Vazirlar Mahkamasining qarori bilan avtomobillardan chiqadigan ifloslantiruvchi moddalarning atmosferaga yetkaziladigan zarar normativlariga mosligini aniqlash tartibi va tegishli nizom tasdiqlandi. Endilikda, O‘zbekistondagi barcha transport vositalari ekologik toifalarga ajratiladi va ularga maxsus ekologik stikerlar beriladi.
Qanday Mezonlar Asosida Ajratiladi?
Nizomga ko‘ra, har bir avtomobilning ekologik toifasi uning ishlab chiqaruvchi tomonidan tasdiqlangan sinfiga qarab belgilanadi va uch asosiy toifaga bo‘linadi:
«Toza» toifa (Yashil stiker): Benzin yoki gazli mashinalar uchun «Yevro-2» va undan yuqori sinfdagilar, dizellilar uchun «Yevro-4» va yuqori. Shuningdek, Gibrid va elektromobillar, hamda ishlab chiqarilganiga 3 yildan oshmagan transport vositalari ham shu toifaga kiradi.
«O‘rta» toifa (Sariq stiker): Benzin/gazlilar uchun «Yevro-0» va «Yevro-1», dizellilar uchun «Yevro-3» sinfdagilar.
«Zararli» toifa (Qizil stiker): Faqat dizel yoqilg‘isida harakatlanuvchi, eng past – «Yevro-0» dan «Yevro-2» gacha bo‘lgan sinfdagi transportlar.
Stiker Olish Tartibi
Transport vositalarini ro‘yxatga olish jarayonida ularning toifalariga mos ravishda «yashil», «sariq» yoki «qizil» rangli ekologik stikerlar Yo‘l harakati xavfsizligi bo‘linmalarida maxsus operatorlar tomonidan beriladi. E’tiborli jihati, transport egasi stiker olish uchun my.gov.uz portali orqali o‘z xohishiga ko‘ra murojaat qilishi mumkin. Ushbu ekologik stikerlar muddatsiz davrga amal qiladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
