Gruziya prezidenti yangi saylovlar o‘tkazilmasa, “rejimni ag‘darish” bilan tahdid qildi

^{Foto: Gruziya prezidenti matbuot xizmati}
Gruziya prezidenti Salome Zurabishvili agar hukmron “Gruziya orzusi” partiyasi va muxolifat yangi parlament saylovlarini o‘tkazish masalasida kelishuvga erishmasa, “rejimni ag‘darish” bilan tahdid qildi. Bu haqda Interpressnews xabar berdi.

"Inqiroz shunday bosqichga yetib keldiki, boshqa yo‘limiz qolmadi. Qonuniy va konstitutsiyaviy hech qanday yo‘l qolmadi. Faqatgina yangi saylovlar tayinlash qoldi, bu xalqning, mening va siyosiy partiyalarning talabi. Ikki yechim bor: birinchisi — saylovlarni imkon qadar tezroq va saylovchilarning ishonchini tiklaydigan sharoitlarda o‘tkazish. Rahbariyat bilan mazkur saylovlar belgilangan muddatlarda o‘tkazilishi to‘g‘risida kelishuvga erishish zarur", dedi prezident.

U “Gruziya orzusi” partiyasining “xo‘jayini” deb hisoblanadigan milliarder Bidzina Ivanishviliga inqirozni hal etish uchun yangi saylovlarni muhokama qilish maqsadida uchrashishni taklif qildi.

"Agar bu murosali variant, bu muloqot amalga oshmasa, boshqa yo‘l bor — biz bu rejimni ag‘darib, saylovlarga yetib boramiz, boshqa iloj yo‘q. Bu rejim allaqachon buzilgan", dedi Zurabishvili.

Salome Zurabishvilining prezidentlik lavozimidagi muddati 29 dekabrda tugaydi. Amaldagi prezident va gruzin muxolifati oktyabr oyidagi parlament saylovlarini soxtalashtirish deb hisoblagani uchun uning qonuniyligini tan olmayapti. Zurabishvili lavozimni tark etishdan bosh tortmoqda. Gruziya bosh vaziri Irakliy Kobaxidze prezident Salome Zurabishvili lavozimini tark etishdan bosh torsa, qamoqqa tushishi mumkinligini aytgan.

Dekabr oyi o‘rtalarida mamlakatda prezidentlik saylovlari bo‘lib o‘tgan, unda “Gruziya orzusi” tomonidan ilgari surilgan sobiq futbolchi Mixail Kavelashvili g‘alaba qozongan. U yagona nomzod edi va saylovchilarning ovozini oldi. Birinchi marta davlat rahbarini Gruziya fuqarolari emas, balki hay’at sayladi. “Zamin” yangiliklarini “Facebook”da kuzatib boring