00:25 / 10.01.2025

Kaliforniyada dahshatli oʻrmon yongʻinlari: mashhurlarning uylari yonib ketmoqda

^{Pasifik-Paliseydsda yashovchi kishi bino xarobalari ustida
Eugene Garcia / AP / Scanpix / LETA}
Kaliforniya shtatining Los-Anjeles okrugida davom etayotgan oʻrmon yongʻinlari tufayli kamida besh kishi halok boʻlgan. Bu haqda Los-Anjeles oʻt oʻchirish xizmati boshligʻi Entoni Marronga asoslanib ABC News 9 yanvar kuni xabar bergan.

Oʻt oʻchirish xizmati baholariga koʻra, Pasifik-Paliseydsning oʻzida (Hollivudning mashhur shaxslaridan koʻpchiligining uylari joylashgan nufuzli hudud) mingdan ortiq bino yonib ketgan. Iton-Kanyonda ham taxminan shuncha uy vayron boʻlgan yoki jiddiy shikastlangan. Qurbonlarning barchasi mazkur hududdan topilgan.

Los Angeles Times xabariga koʻra, 8 yanvar kuni yongʻin Hollivudning mashhur belgisi joylashgan tepalikka etib kelgan. Olov Hollivud bulvari va «Shon-sharaf xiyoboni» yaqinida ham tarqalgan, deb xabar bermoqda Hollywood Reporter. Mahalliy aholi vakillaridan biri hududdagi vaziyatni «xaotik» deb atagan. «Yoʻllar oʻt oʻchiruvchilar va politsiyachilar avtomobillari, shuningdek, ketishga urinayotgan kishilarning mashinalari bilan toʻlgan», — degan u CNN muxbiriga.

ABC News yozishicha, Los-Anjelesda oʻrmon yongʻinlarining oltita oʻchogʻi aniqlangan va shundan faqat bittasida vaziyat nazoratga olingan. CNN xabarida beshta yongʻin oʻchogʻi haqida gap boradi, bittasi faqat 40 foizga lokallashtirilgan. Jami 130 ming kishi yashaydigan hududlarda evakuatsiya amalga oshirish buyrugʻi berilgan, oʻn minglab kishilar allaqachon xavfsiz joylarga koʻchirilgan yoki uylarini mustaqil ravishda tark etgan.

Kuchli shamol va quruq ob-havo yongʻinga qarshi kurashishni qiyinlashtirmoqda. Barcha yongʻinlarning jami maydoni 100 kilometr kvadratdan oshadi.

^{Altadena hududida yongʻin oqibatlari
Scott Mc Kiernan / ZUMA Press Wire / Scanpix / LETA}

^{Pasifik-Paliseydsda yonib ketgan bino
Agustin Paullier / AFP / Scanpix / LETA}

^{Pasifik-Paliseyds hududi. Foto: Agustin Paullier / AFP / Scanpix / LETA}
Malibuda yongʻin oqibatida amerikalik aktrisa Peris Hiltonning uyi yonib ketgan. «Oilam bilan oʻtirib, yangiliklarda Malibudagi uyimiz tag-tubi bilan yonib ketganini jonli kuzatdik — bu men hech kimga ravo koʻrmaydigan hodisa», — degan aktrisa instagramdagi sahifasida.

Xabarlarga koʻra, yongʻinda Malibudagi bir vaqtlar Leonardo di Kaprioga tegishli boʻlgan uy ham vayron boʻldi. Tinch okeani sohilidagi avtomagistralda joylashgan uy 2021 yilda 10 million dollarga sotilgandi, unga qadar di Kaprio yigirma yildan ortiq vaqt davomida ushbu uyga egalik qilgan.

Yongʻin kechayotgan Tinch okeani sohilidagi Malibu shahri va Paliseyds hududida koʻplab mashhurlarning uylari bor. Yongʻin oqibatida bu hududlarda butun boshli mavzelarning kuli koʻkka sovurilgan.

TMZ va Page Six tabloidlari ma'lumotiga koʻra, Entoni Hopkins, Tom Henks, Ben Afflek, Mayls Teller, Mendi Mur, Adam Brodi, Spenser Bratt, Jon Gudmen, Bill Kristal va Yudjin Levi kabi aktyorlarning uylari ham alanga ichida qolgan. Aktyorlarning oʻzi hozircha buni tasdiqlamagan.

Sky News xabar berishicha, yongʻin tarqalgan hududlarda Mett Deymon, Stiven Spilberg, Dr. Dre, Adam Sendler, Beyonse, Jay-Z, Kim Kardashyan, Ledi Gaga va Billi Aylish kabi mashhurlarning qarorgohlari bor. Oʻrmon yongʻinlari sababli evakuatsiya qilinganlar orasida Mark Hemill, Jeyms Vuds kabi aktyorlar ham borligi xabar qilingan.

AQSh prezidenti Jo Bayden Kaliforniyadagi yongʻinlar tufayli Rim va Vatikanga rejalashtirilgan tashrifini bekor qildi. U gubernator Gevin Nyusomning soʻrovini qanoatlantirib, yirik tabiiy ofat haqida e'lon qildi. Bunday chora Los-Anjeles okrugida jabrlanganlarni federal miqyosda moliyalashtirish imkonini beradi.

«Yordam vaqtinchalik uy-joy va uylarni ta'mirlash uchun grantlar, sugʻurtalanmagan mulk yoʻqotishlarini qoplash uchun arzon kreditlar hamda jismoniy shaxslarga va biznes egalariga tabiiy ofat oqibatlaridan xalos boʻlishda yordam beradigan boshqa dasturlarni oʻz ichiga olishi mumkin», — deyiladi Bayden ma'muriyati bayonotida.

^{Altadena hududida yongʻin oqibatlari
Amy Katz / ZUMA Press Wire / Scanpix / LETA}

^{Los-Anjelesda yonib ketgan uy
Mike Blake / Reuters / Scanpix / LETA}

^{Los-Anjelesda yonib ketgan uy
Mike Blake / Reuters / Scanpix / LETA}
«Paliseyds yongʻini» (The Palisades Fire) AQSh tarixidagi eng «qimmatga tushgan» ofat boʻlishi mumkin. Etkazilgan zarar miqdori allaqachon 57 milliard dollardan oshib ketgan va raqamlar ortib boraveradi.

Yongʻinlar tufayli Amerika kinoakademiyasi «Oskar» uchun nomzodlarni e'lon qilish marosimini 17 yanvardan 19 yanvarga koʻchirgan. «Biz Janubiy Kaliforniyadagi vayronkor yongʻinlardan jabrlanganlarga chuqur hamdardligimizni izhor etamiz. Akademiyamizning koʻplab a'zolari va sohadagi hamkasblarimiz Los-Anjeles hududida istiqomat qiladi va ishlaydi, biz haqingizda qaygʻuramiz», — deyilgan akademiya direktori Bill Kramerning maktubida. Yongʻinlar munosabati bilan Amerika kinostudiyalari Los-Anjeles atrofida serial va filmlar ishlashni toʻxtatgan. Bular orasida «Ehtiros anatomiyasi», Fallout, «Ebbott boshlangʻich maktabi» va boshqa seriallar bor.

Pasifik-Paliseyds hududi evakuatsiya va yongʻindan keyin «arvoh shahar»ga oʻxshab qolgan, deydi CNN muxbiri Li Uoldman. U misol sifatida bir necha soat oldinroq butun turgan, ammo koʻp oʻtmay faqat xarobalari qolgan mahalliy san'at galereyasi tasvirlarini keltirgan.

Los-Anjeles okrugi prokurori Natan Hokman talonchilik va yongʻindan jabrlanganlarga hujum qilish holatlari uchrayotganini ma'lum qilgan. U «boshqalarning dardi va iztirobidan foydalanib qolishga uringan kimsalarning hech biri jazosiz qolmasligi»dan ogohlantirgan. Okrug sherifi Robert Luniga koʻra, ikki kishi talonchilik qilgani uchun hibsga olingan.

Kaliforniya Oʻrmon yongʻinlari Malibu Paliseyds