Ko‘rfaz kubogida Qatar amaldagi chempionni mag‘lub etdi

Saudiya Arabistonining Jidda shahrida o‘tayotgan Ko‘rfaz kubogida V guruhi jamoalari musobaqani ishonchli boshladi. 1-turning har ikki uchrashuvida ham g‘oliblar raqib darvozasini ikki va undan ortiq marta ishg‘ol qildi.

BAAdan yirik g‘alaba

Zlatko Dalich boshqarayotgan BAA Yamanni 4:0 hisobida mag‘lub etdi. Gollarni Ximenes (26, 51), Yaman himoyachisi Sahal (36 — avtogol) va Pereyra (45+4) kiritdi.

Qatar chempionni to‘xtatdi

Kunning e’tiborga molik natijalaridan biri Qatar — Bahrayn uchrashuvida qayd etildi. Xulen Lopetegi shogirdlari amaldagi chempionni 2:0 hisobida mag‘lub etdi.

Qatar safida Huhi 61-daqiqada hisobni ochgan bo‘lsa, Al Haydos 90+9-daqiqada penaltidan foydalanib, yakuniy natijani belgiladi.

Shu tariqa, V guruhida 1-turdan so‘ng BAA va Qatar g‘alaba bilan musobaqa boshladi. Avvalroq A guruhida dastlabki tur uchrashuvlari o‘tkazilgan edi.