Isroil armiyasi qoʻmondoni iste'foga chiqadi

^{Foto: Yonatan Sindel/Flash90}
Isroil Mudofaa kuchlari (TsAHAL) shtab boshligʻi general-leytenant Gertsi Ha-Levi shu yilning mart oyida iste'foga chiqishini ma'lum qildi. U HAMAS terrorchilari tomonidan 2023 yil 7 oktyabrda amalga oshirilgan hujumni qaytara olmagani uchun «javobgarlikni tan olgan holda oʻz lavozimini tark etmoqda», deb yozdi The Times of Israel.

Ha-Levi vakolat muddati tugashiga 10 oy qolganda, 6 mart kuni iste'foga chiqadi. Bu haqda u bosh vazir Binyamin Netanyahu va mudofaa vaziri Israel Kasga maktub yubordi.

Qolgan olti hafta ichida Ha-Levi Isroil armiyasining 7 oktyabrdagi muvaffaqiyatsizliklari haqidagi hisoboti ustida ishlashni rejalashtirmoqda.

2024 yil aprel oyida Isroil harbiy razvedkasi rahbari general-mayor Aaron Haliva iste'foga chiqqan edi. U ham 7 oktyabr kunidagi muvaffaqiyatsizliklar uchun javobgarlikni oʻz zimmasiga oldi. The New York Times xabariga koʻra, Isroil razvedka idoralari Falastinning HAMAS guruhi harbiy rejalari haqida 2023 yil 7 oktyabrdan bir yildan koʻproq vaqt oldin xabar topgan, ammo jiddiy qabul qilmagan. “Zamin” yangiliklarini “Telegram”da kuzatib boring