$500 milliardlik sun'iy intellekt loyihasi: Stargate e'lon qilindi

AQShda sun'iy intellekt infratuzilmasi uchun $500 milliard: Tramp "Stargate" loyihasini e'lon qildi.
OpenAI, Oracle va SoftBank Texasda sun'iy intellektni rivojlantirish uchun birlashdi.

21-yanvar kuni AQSh prezidenti Donald Tramp "Stargate" nomli hamkorlikdagi loyihani e'lon qildi. Ushbu loyiha sun'iy intellekt bilan bogʻliq infratuzilma uchun $500 milliardgacha investitsiya qilishni rejalashtirmoqda. Loyiha OpenAI, Oracle va SoftBank kompaniyalari tomonidan amalga oshiriladi.

Oq Uy ma'lumotlariga koʻra, Stargate Texasda sun'iy intellektni rivojlantirish uchun ma'lumot markazlari va energiya infratuzilmasi qurishni boshlaydi. Dastlabki investitsiyalar $100 milliardni tashkil etadi va bu miqdor besh baravarga etishi mumkin.

«Bu ulkan mablagʻ va yuqori sifatli odamlar», – dedi Tramp. U loyiha Amerika salohiyatiga ishonchning belgisi ekanligini ta'kidladi.

Tramp bilan birga Oq uyda SoftBank asoschisi Masayoshi Son, OpenAI rahbari Sem Altman va Oracle boshligʻi Larri Ellison ham ishtirok etdi. Ellison loyihani shaxsiy tibbiyot texnologiyalari, xususan, individual vaktsinalar yaratishda yangi imkoniyatlar bilan bogʻladi.

Loyiha rejasi dastlab 2024-yilda ishlab chiqilgan va Bayden ma'muriyati davridan boshlangan edi. Shuningdek, loyiha Microsoft, Arm, NVIDIA va MGX kabi boshqa hamkorlarni oʻz ichiga oladi. “Zamin” yangiliklarini “Telegram”da kuzatib boring