Rossiya va Ukraina 150 harbiy asirni almashdi

Rossiya va Ukraina navbatdagi harbiy asirlarni almashish jarayonini amalga oshirdi. Har ikki tomon ham 150 nafardan harbiy asirni ozod qildi. Asirlarni qaytarish jarayonida Birlashgan Arab Amirliklari (BAA) vositachilik qildi. Bu haqda Rossiya Mudofaa vazirligi oʻzining Telegram-kanalida ma'lum qildi.

Xabarga koʻra, 5-fevral kuni muzokaralar natijasida Kiyev nazoratidagi hududdan 150 nafar rossiyalik harbiy qaytarilgan, evaziga esa 150 nafar Ukraina qurolli kuchlari askarlari topshirilgan.

Rossiya tomonidan ozod qilingan askarlar hozirda Belarusda boʻlib, ularga tibbiy va psixologik yordam koʻrsatilmoqda hamda yaqinlari bilan bogʻlanish imkoniyati berilgan. Keyinchalik ular Rossiyaga etkaziladi.

Ukraina Prezidenti Vladimir Zelenskiy ham oʻzining Telegram-kanalida bu almashinuvni tasdiqladi. Uning soʻzlariga koʻra, ozod etilgan 150 ukrainalik harbiy orasida Mariupol va Zaporoje viloyatida asirga tushgan dengiz piyodalari, havo kuchlari vakillari, desantchilar, milliy gvardiyachilar, chegara qoʻshinlari hamda bir nafar politsiyachi bor. Ayrimlar ikki yildan ortiq asirlikda boʻlishgan.

Bundan avval, 2024-yil 30-dekabr kuni ham Rossiya va Ukraina xuddi shunday formatda — "150 ga 150" shaklida harbiy asirlarni almashgan edi. Oʻshanda ham BAA vositachilik qilgan edi.

13-yanvar kuni Rossiya Prezidenti matbuot kotibi Dmitriy Peskov harbiy asirlarni almashish jarayoni murakkab kechayotganini, ammo bu boradagi ishlar davom ettirilishini ma'lum qilgan edi. “Zamin” yangiliklarini “Telegram”da kuzatib boring