Uorren Baffett Berkshire Hathaway kompaniyasining rahbarligidan ketadi: uning vorisi ham ma’lum

Dunyodagi eng mashhur investorlardan biri, amerikalik milliarder Uorren Baffett Berkshire Hathaway kompaniyasining bosh direktori lavozimidan iste’foga chiqishini ma’lum qildi. Bu haqda Baffett kompaniya aksiyadorlari bilan bo‘lib o‘tgan yillik yig‘ilishda rasman e’lon qildi.

94 yoshli Baffett o‘z o‘rniga yangi rahbar sifatida o‘zining o‘rinbosari Greg Abelni tayinlashni tavsiya qildi. Shu bilan birga, u kompaniyadan butunlay ketish yoki aksiyalarini sotish niyati yo‘qligini ma’lum qildi va Berkshire Hathaway'dagi ishtirokini davom ettirishini ta’kidladi.

Uorren Baffett dunyodagi eng boy shaxslar qatoriga kiradi va Forbes jurnalining so‘nggi yillik reytingida uning kapitalining umumiy hajmi 159 milliard dollarga baholangan. U o‘zining ulkan boyligini ko‘plab omadli investitsiyalar orqali to‘plagan.

Baffett Berkshire Hathaway'ni dastlab 1965 yilda sotib olgan va o‘sha paytda bu kompaniya uning tug‘ilgan joyi bo‘lgan Nebraska shtatidagi kichik tekstil fabrikasi edi. Baffett uni tez orada investitsiya va sug‘urta sohalarida yirik xalqaro kompaniyaga aylantirib, uning bozor qiymatini trillion dollardan oshirdi.

Hozirgi paytda Berkshire Hathaway dunyodagi eng nufuzli va qimmat kompaniyalardan biri hisoblanadi. Baffettning qaroridan keyin Greg Abel kompaniyaning kelgusi taraqqiyoti va uning investitsiya strategiyasini belgilaydigan asosiy shaxs bo‘ladi. “Zamin”ni Telegramʻda oʻqing!