Berni Sanders: Netanyaxu yadroviy muzokaralarni izdan chiqardi

Yaqin Sharqdagi katta siyosiy bo‘hronlar fonida AQSH siyosiy doiralarida ham keskin fikrlar yangramoqda. Vermont shtati senatori Berni Sanders Isroil bosh vaziri Binyamin Netanyaxuni AQSH va Eron o‘rtasidagi yadroviy kelishuv bo‘yicha muzokaralarni izdan chiqarganlikda aybladi. U o‘zining X ijtimoiy tarmog‘idagi sahifasida bu holat haqida keskin bayonot bilan chiqdi.

Senator Sanders o‘z murojaatida: “Netanyaxu hukumati ekstremistik yo‘nalishda harakat qilmoqda, xalqaro huquq talablariga doimiy ravishda rioya etmaydi. Bu esa dunyodagi xavf va beqarorlik darajasini yanada oshirdi”, — deya ta’kidladi. Uning fikricha, Netanyaxuning bir tomonlama va qonunga zid harakatlari mintaqadagi vaziyatni yanada chigallashtirgan.

13 iyunga o‘tar kechasi Isroil harbiy kuchlari Eronning yadroviy, raketa va harbiy obyektlariga, shuningdek, yuqori lavozimli harbiy qo‘mondonlar va yetakchi olimlarga keng ko‘lamli hujum uyushtirdi. Hujumlar natijasida Islom inqilobi qo‘riqchilari korpusining rahbarlari — Husayn Salamiy, Muhammad Baqeriy, G‘ulom Ali Rashid, shuningdek, fizik-yadroshunos olimlar Faridun Abbosiy Davoniy va Ozod Muhammad Mahdiy Tehronchiy halok bo‘ldi. Jami 78 kishi halok bo‘ldi, 320 dan ortiq inson jarohat oldi.

Sandersning ta’kidlashicha, ushbu zarbalar AQSHning mintaqadagi asosiy maqsadlariga — muammoni diplomatik yo‘l bilan hal etish, muzokaralar yo‘lidagi tajribasiga zid keladi. Uning aytishicha, muzokaralar yakshanba kuniga belgilangan edi, ammo Netanyaxu ularni bekor qilib, harbiy yo‘lni tanladi.

Senatorning bayonotida alohida qayd etildiki, Netanyaxu avval G‘azoda bolalar ochligidan siyosiy maqsadlarda foydalangan, endi esa mintaqani keng ko‘lamli urush domiga tortayotgani, xalqaro qonun va Jeneva konvensiyalarini qo‘pol ravishda buzgani dunyo uchun jiddiy xavf tug‘dirmoqda.

U, shuningdek, AQSHni “Netanyaxuning navbatdagi urushi”ga aralashmaslikka va xalqaro hamjamiyat bilan birgalikda mojaroni tinch yo‘l bilan hal etishga, taraflarni muzokaralar stoliga o‘tqazish uchun barcha imkoniyatlardan foydalanishga chaqirdi.

Ma’lumki, Eron va AQSH aprel oyidan beri yadroviy kelishuvni qayta tiklash uchun beshta muzokara raundi o‘tkazdi. Ular asosan Ummon hududida va bilvosita shaklda bo‘lib o‘tdi. Eron esa haligacha yadro quroli yaratishga intilmayotganini ta’kidlab, uranni boyitishdan voz kechish niyati yo‘qligini bildirmoqda.

Vaziyat keskinlashib borayotgan bir paytda, xalqaro hamjamiyat tinchlik va barqarorlik uchun jiddiy diplomatik sa’y-harakatlar olib borish zarurligini yana bir bor anglamoqda.

Zamin.uz sayti mintaqadagi barcha so‘nggi yangiliklar, siyosiy bayonotlar va xalqaro muzokaralar yuzasidan tezkor axborot berishda davom etadi. “Zamin”ni Telegramʻda oʻqing!