Hindistonning Andxra-Pradesh shtatida joylashgan Bukkarayasamudram qishlog‘ida yurakni ezuvchi fojea ro‘y berdi. Bu voqea haqida xabar berilishicha, 18 oylik qizaloq maktab oshxonasida tasodifan qaynayotgan sut idishiga tushib ketib, og‘ir kuyish oqibatida vafot etgan.
Ma’lumotlarga ko‘ra, maktab qo‘riqchisi o‘sha kuni kichik qizi Akshitani ish joyiga olib kelgan. Bu fojeadan dalolat berilishicha, bola mushukni quvib oshxona tomon yugurgan va o‘sha paytda o‘quvchilar uchun qaynatilayotgan katta sut qozoniga tushib ketgan.
Hodisa vaqtida qizchaning onasi ham shu yerda bo‘lib, dahshatli manzarani ko‘rgach, darhol bolasini qozondan olib chiqqan. Biroq qizaloqning tanasining katta qismi kuygani sababli, u shoshilinch ravishda shifoxonaga yetkazilgan.
Shifokorlar bolani saqlab qolish uchun uch kun davomida kurash olib borishgan, ammo og‘ir kuyish natijasida chaqaloq hayot bilan vidolashgan.
Mahalliy politsiya hodisa yuzasidan tekshiruv boshlagan. Hukumat va ta’lim muassasasi mas’ullari tomonidan ham xizmat tekshiruvi o‘tkazilmoqda.
Tergov ma’lumotlariga ko‘ra, maktab oshxonasida o‘quvchilar uchun sut qaynatish jarayoni davom etayotgan paytda, xavfsizlik choralari yetarli darajada ta’minlanmagan.
“Zamin”ni Telegramʻda oʻqing!
