Ukraina prezidenti Volodimir Zelenskiy AQShdan ehtimoliy olinadigan Tomahawk (“Tomagavk”) qanotli raketalari haqida fikr bildirib, ular faqat harbiy obyektlarga qaratilgan boʻlishini taʼkidladi. Uning soʻzlariga koʻra, Ukraina hech qachon Rossiyaning tinch aholisiga qarshi hujum qilmaydi.
12 oktabr, yakshanba kuni Zelenskiy Fox News telekanaliga bergan intervyusida bu masalaga oydinlik kiritdi. “Faqat harbiy nishonlar. Biz hech qachon ularning tinch aholisiga hujum qilmaymiz”, — dedi u The Sunday Briefing dasturi efirida.
Shu kuni Zelenskiy ikki kun ichida AQSh prezidenti Donald Tramp bilan ikkinchi suhbatni ham amalga oshirdi. Ukraina rahbari bu muloqotni “juda samarali” deb baholab, ikki tomon dolzarb masalalar boʻyicha kelishuvga erishganini maʼlum qildi. “Kecha biz bugungi kun uchun muhim yoʻnalishlarni belgilab oldik va vaziyatning barcha jihatlarini koʻrib chiqdik”, — deb yozdi u ijtimoiy tarmoqda.
Axios nashri maʼlum qilishicha, 11 oktabr kuni boʻlib oʻtgan ilk suhbatda ham AQShdan Ukrainaga Tomahawk raketalarini yetkazib berish masalasi muhokama qilingan. Zelenskiyning taʼkidlashicha, Rossiya bu ehtimoldan xavotirga tushgani yaqqol koʻzga tashlanmoqda.
“Biz Rossiyaning amerikaliklar bizga ‘Tomagavklar’ berishi mumkinligidan chinakam qoʻrqishini koʻryapmiz. Bu holat tinchlik yoʻlidagi bosimning samarali ekanidan dalolat beradi”, — deb yozdi Zelenskiy oʻz bayonotida.
Kuzatuvchilar fikricha, agar AQShdan Ukrainaga uzoq masofaga uchuvchi raketalar yetkazib berilsa, bu Rossiya ustidan harbiy bosimni kuchaytirishi mumkin. Biroq Zelenskiyning taʼkidlashicha, Ukraina bu qurollarni faqat mudofaa va xalqaro huquq doirasida foydalanish niyatida.
Shunday qilib, Kievning asosiy pozitsiyasi aniq: hech qanday hujum tinch aholiga qaratilmasligi, barcha harakatlar faqat Rossiyaning harbiy infratuzilmasiga nisbatan amalga oshirilishi lozim.
“Zamin”ni Telegramʻda oʻqing!
