Meksikada so‘nggi kunlarda tabiiy ofatlar sabab yuz bergan halokatli fojea mamlakatni titratdi. Priskitla va Reymond tropik bo‘ronlari oqibatida sodir bo‘lgan kuchli yomg‘ir va suv toshqinlari natijasida halok bo‘lganlar soni 72 nafarga yetdi. Bu haqda mahalliy ommaviy axborot vositalari xabar berdi.
Ma’lumotlarga ko‘ra, ofat tufayli yana 48 nafar fuqaro hanuz bedarak hisoblanmoqda. Qidiruv-qutqaruv ishlari to‘xtovsiz davom etmoqda, ammo hozircha barcha bedarak yo‘qolganlarni topish imkoni bo‘lmagan.
Oxirgi hafta davomida Meksikaning beshta shtatida — Verakrus, Puebla, Idalgo, Tabasko va Oaxaka hududlarida kuchli yomg‘ir va sel oqibatida katta yo‘qotishlar qayd etilgan. Eng katta zarar Verakrus va Puebla viloyatlariga yetgan — ko‘plab uylar vayronaga aylangan, ko‘prik va yo‘llar vayron bo‘lgan, minglab odamlar boshpanasiz qolgan.
Meksika hukumati ofat oqibatlarini bartaraf etish uchun yirik kuchlarni jalb etgan. Rasmiy ma’lumotlarga ko‘ra, qidiruv-qutqaruv ishlariga 21 ta vertolyot va qo‘shimcha qutqaruv guruhlari safarbar qilingan. Ular asosan suv bosgan hududlar, yo‘llar, chuqur jarliklar va vayrona binolarda izlash ishlarini amalga oshirmoqda.
Meksikaning Elektr energiyasi bo‘yicha federal komissiyasi (CFE) bildirishicha, tabiiy ofatdan jabr ko‘rgan beshta shtatda elektr ta’minoti tizimining qariyb 95,4 foizi tiklangan. Elektr muhandislari va mahalliy kommunal xizmatlar hamkorlikda faoliyat yuritmoqda.
Shu bilan birga, hukumat evakuatsiya qilingan aholi uchun vaqtincha turar joylar tashkil etgan. Jabrlanuvchilarga oziq-ovqat, suv va tibbiy yordam yetkazish ishlari kecha-yu kunduz davom etmoqda.
Mahalliy OAV xabariga ko‘ra, Priskitla va Reymond tropik bo‘ronlari Meksika sohillariga urilishi bilan atmosfera bosimi keskin pasaygan va 24 soat ichida o‘nlab yo‘llarni suv bosgan. Ayrim hududlarda suv sathi ikki metrgacha ko‘tarilgan.
“Zamin”ni Telegramʻda oʻqing!
