Parijda o‘tkazilgan auksionda Pablo Pikassoning “Gul naqshli shlyapa kiygan ayol byusti (Dora Maar)” nomli asari 37 million dollarga sotildi, deb xabar berdi “Associated Press”.
Asar auksionga dastlab 9–11,6 million dollar orasida baholangan holda qo‘yilgan edi, ammo yakunda kutilgan narxdan to‘rt baravar qimmatga sotildi. Bu rasm mashhur rassomning ilhom manbai va sevgilisi bo‘lgan Dora Maarning portretidir.
Pikasso bu asarni 1943 yil iyul oyida yaratgan. Oradan bir yil o‘tib, u xususiy kolleksiyaga o‘tgan va 80 yil davomida shaxsiy qo‘llarda saqlangan. Mutaxassislar asarning saqlanish holatini “mukammal” deb baholagan.
Dora Maarning o‘zi ham rassom va fotograf bo‘lgan. Uning Pikasso bilan munosabatlari 1936 yildan 1945 yilgacha davom etgan.
San’at tanqidchilari ta’kidlashicha, bu asar nafaqat Pikassoning sevgi va ilhom davrini ifoda etadi, balki u yaratgan ikkinchi jahon urushi yillaridagi psixologik holatini ham namoyon qiladi.
“Zamin”ni Telegramʻda oʻqing!
