Qozog‘istonning Aqmola viloyati, Burabay tumaniga qarashli Shchuchinsk shahrida joylashgan “Osh markazi” ovqatlanish maskanida yuz bergan portlash va undan keyingi yong‘in og‘ir oqibatlarga olib keldi. Dastlabki ma’lumotlarda kamida olti kishi halok bo‘lgani, taxminan 20 nafar odam jabrlangani aytildi. Keyinroq Qozog‘istonning Qazinform agentligi qurbonlar soni yetti nafarga yetgani, jabrlanganlar esa 19 nafar ekanini yozdi.
Xabarlarga ko‘ra, fojia tunda sodir bo‘lgan va voqea joyiga tezkor tarzda qutqaruv xizmatlari yetib borgan. O‘t o‘chiruvchilar alanga ichida qolgan binodan sakkizta gaz ballonini olib chiqishga muvaffaq bo‘lgan, shuningdek, o‘n nafardan ortiq kishini xavfli hududdan qutqarib chiqqan. Bu esa halokat ko‘lamini yanada kattalashib ketishining oldini olgan muhim omillardan biri bo‘ldi.
Rasmiy ma’lumotlarga ko‘ra, Moskva vaqti bilan soat 22:40 holatiga borib yong‘in to‘liq bartaraf etilgan. Ayni paytda portlash va yong‘inning aniq sabablari, shuningdek, hodisaga olib kelgan omillar yuzasidan tekshiruv ishlari olib borilmoqda. Qazinform ma’lumotiga ko‘ra, ushbu holat ortidan jinoiy ish ham qo‘zg‘atilgan.
Hodisa joyida favqulodda vaziyatlar xizmati xodimlari, mahalliy hokimiyat vakillari, shifokorlar, politsiya, shuningdek, gaz-texnik nazorat mutasaddilari ish olib bormoqda. Qutqaruvchilar vayronalarni tozalash, jarohat olganlarga yordam ko‘rsatish va hodisaning barcha tafsilotlarini tiklash bilan band.
Bu fojia butun mintaqa uchun og‘ir xabar bo‘ldi. Odatiy bir ovqatlanish maskanida ro‘y bergan bu halokat bir lahza ichida bir necha oilaning hayotini izdan chiqardi. Hozir eng muhim masala — jabrlanganlarning ahvoli, sabablarning to‘liq ochiqlanishi va bunday kulfat yana takrorlanmasligi uchun qat’iy xulosa chiqarilishidir.
“Zamin”ni Telegramʻda oʻqing!
