Eron tashqi ishlar vaziri Abbos Arakchi Yaqin Sharqdagi vaziyat yuzasidan keskin bayonot berdi. U xalqaro hamjamiyatning o't ochishni to'xtatish haqidagi chaqiriqlarini rad etib, mamlakat xavfsizligini ta'minlash uchun kurashni davom ettirish zarurligini ta'kidladi. Arakchining so'zlariga ko'ra, AQSH va Isroil tomonidan amalga oshirilayotgan harakatlar tinch aholi va shifoxonalarga zarar yetkazmoqda, bu esa mintaqadagi vaziyatni yanada murakkablashtirmoqda. Bu haqda tengrinews.kz xabar beradi.
Vazir NBC News telekanaliga bergan intervyusida Isroil va AQSH avval erishilgan kelishuvlarni buzganini eslatib o'tdi. Uning fikricha, vaqtinchalik sulhlar samarasiz bo'lib, mintaqada urushni butunlay va doimiy ravishda to'xtatish kerak. Arakchi Eron qo'shni davlatlarga qarshi emas, balki ularning hududida joylashgan AQSH bazalari va obyektlariga zarba berayotganini qayd etdi. Shuningdek, Eron prezidenti Masud Pezeshkian mintaqa aholisidan yuzaga kelgan noqulayliklar uchun uzr so'ragan.
Arakchi AQSHning ehtimoliy quruqlikdagi bosqiniga nisbatan ham ogohlantirish berdi. Uning ta'kidlashicha, Eron harbiylari mamlakat hududiga kirgan har qanday dushmanni yo'q qilishga tayyor. Eron tomoni diplomatik yo'llar bilan urushning oldini olishga uringan bo'lsa-da, tashqi tajovuz ularni o'zini himoya qilishga majbur qilganini bildirmoqda.
“Zamin”ni Telegramʻda oʻqing!
