Eron tashqi ishlar vaziri Abbos Aroqchi AQSHning mamlakat hududiga quruqlik orqali harbiy aralashuvi ehtimoliga munosabat bildirdi. Uning ta’kidlashicha, bunday qadamga Vashingtonning jur’at etishi juda ham shubhali.
Aroqchi o‘z bayonotida AQSH tomoni ehtimoliy hujum oqibatlarini yaxshi anglab yetganini urg‘uladi. “Ular bunday qaror qabul qiladi, deb o‘ylamayman. Agar shunday bo‘lsa, ularni juda katta yo‘qotishlar kutadi”, — dedi vazir.
Shu bilan birga, u so‘nggi to‘qnashuvlarda AQSH harbiy infratuzilmasiga yetkazilgan zararlarga ishora qildi. Xususan, razvedka va havo kuzatuv tizimlari, jumladan AWACS samolyotlari bilan bog‘liq holatlarni eslab o‘tdi.
Vazirning fikricha, quruqlikdagi ehtimoliy harbiy harakatlar Eron uchun yanada qulayroq ssenariy hisoblanadi. “Quruqlikdagi janglarda biz ancha ustunmiz”, — deya ta’kidladi u.
Bayonot yakunida Aroqchi mamlakat har qanday tashqi tahdidga tayyor ekanini bildirdi. Uning aytishicha, Eron armiyasi va mudofaa tizimi hududiy xavfsizlikni ta’minlash uchun yetarli imkoniyatlarga ega.
Mutaxassislar esa bunday keskin bayonotlar mintaqadagi geosiyosiy vaziyatni yanada taranglashtirishi mumkinligini qayd etmoqda.
“Zamin”ni Telegramʻda oʻqing!
