AQSH prezidenti Donald Tramp o‘zining Truth Social platformasida bergan bayonotida Eron portlari atrofida dengiz orqali to‘liq qamal amaliyoti boshlanganini maʼlum qildi. Uning so‘zlariga ko‘ra, AQSH harbiy-dengiz kuchlari hozirda mintaqadagi nazoratni kuchaytirib, Eron dengiz yo‘laklariga kirishni keskin cheklamoqda.
Tramp bayonotida Eron harbiy-dengiz kuchlari deyarli to‘liq yo‘q qilinganini iddao qildi va ularni “dengiz tubida” deb taʼrifladi. Shuningdek, u Yaqin Sharqdagi harbiy operatsiyalar davomida 158 ta kema yo‘q qilinganini aytdi.
Prezidentning bildirishicha, qolgan bir qismi — yaʼni “tezkor zarba beruvchi” deb ataladigan kichik kemalar — hozircha yo‘q qilinmagan, chunki ular jiddiy tahdid sifatida baholanmagan.
Tramp, shu bilan birga, agar ushbu kemalar eʼlon qilingan qamal hududiga yaqinlashsa, ularga qarshi darhol kuch ishlatilishi va yo‘q qilinishini taʼkidladi. Uning aytishicha, AQSH avvalroq dengizdagi narkotrafikka qarshi qo‘llagan qattiq usullar bu yerda ham qo‘llanilishi mumkin.
“Bu tez va shafqatsiz amalga oshiriladi. AQSH hududiga dengiz orqali kirib kelayotgan giyohvand moddalarning 98,2 foizi to‘sib qo‘yildi,” — dedi Tramp.
13 apreldan boshlab AQSH harbiy-dengiz kuchlari Eron portlariga kirish yo‘llarini bloklash va xavfsiz o‘tish uchun to‘lov amalga oshirgan kemalarni ham to‘xtatib qolishni rejalashtirmoqda. Tramp bu jarayonda boshqa davlatlar ham ishtirok etishi mumkinligini aytgan, ammo hozircha hech bir davlat rasman qo‘shilmagan.
Hozircha vaziyat keskinligicha qolmoqda va ushbu bayonot xalqaro maydonda yangi diplomatik muhokamalarga sabab bo‘lishi mumkin.
“Zamin”ni Telegramʻda oʻqing!
