Rossiyada ko‘chada namoz o‘qigan o‘zbekistonlik deportatsiya qilinmoqda
Sankt-Peterburg shahrida ko'chada namoz o'qigan O'zbekiston fuqarosi Dadaboyev missionerlik faoliyatida ayblanib, Rossiyadan majburiy tarzda chiqarib yuboriladigan bo'ldi. Sankt-Peterburg судлари matbuot xizmati rahbari Darya Lebedevaning ma'lum qilishicha, voqea 12-may kuni Savushkin ko'chasida sodir bo'lgan. Sud qaroriga ko'ra, tegishli ruxsat va vakolatga ega bo'lmagan holda diniy marosim o'tkazgani uchun unga 30 ming rubl miqdorida jarima tayinlangan.
Россиянинг Санкт Петербург шаҳрида кўчада намоз ўқиган Ўзбекистон фуқароси миссионерлик фаолиятида айбланиб, мамлакатдан чиқариб юбориладиган бўлди. Бу ҳақда Санкт Петербург судлари матбуот хизмати раҳбари Даря Лебедева маълум қилди.
Маълумотларга кўра, воқеа 12 май куни Савушкин кўчасида содир бўлган. Полиция ходимлари Дадабоев исмли Ўзбекистон фуқаросини жамоат жойида намоз ўқиётган вақтида аниқлаган. Шундан сўнг унга нисбатан “миссионерлик фаолияти билан шуғулланган” деган айб қўйилган.
Суд вакили маълум қилишича, айбланувчи тегишли рухсат ва ваколатга эга бўлмаган ҳолда имом сифатида диний маросим ўтказган деб баҳоланган. Шунингдек, у маҳаллий ҳокимият идоралари билан келишмасдан жамоат жойида намоз ибодатини адо этгани таъкидланган.
Ўзбекистон фуқароси чет эллик сифатида Россия Маъмурий жавобгарлик тўғрисидаги кодексининг 5.26-моддаси 5-қисми асосида жавобгарликка тортилган. Суд жараёнида у айбини тан олгани ва кўчада намоз ўқиш мумкин эмаслигидан хабардор бўлмаганини айтган.
Суд қарорига кўра, унга 30 минг рубль миқдорида жарима тайинланди ҳамда Россия ҳудудидан мажбурий тарзда чиқариб юбориш чораси белгиланди.
Қайд этиш жоиз, бу каби ҳолат илк бор кузатилаётгани йўқ. Жорий йил февраль ойида ҳам Россияда ётоқхона эшигини очиқ қолдирган ҳолда намоз ўқиган яна бир Ўзбекистон фуқароси “миссионерлик”да айбланиб, жарима ва депортация жазосига дуч келган эди.
Izohlar 0
…