Saakashvili qamoqxonaga qaytarilgandan so‘ng tarafdorlariga murojaat yo‘lladi

Gruziyaning sobiq prezidenti Mixail Saakashvili harbiy gospitaldan Rustavi shahridagi qamoqxonaga qaytarilgandan so‘ng tarafdorlariga birinchi murojaatini yo‘lladi. Siyosatchi o‘z postini Facebook’dagi sahifasida e’lon qilgan.

Murojaatida Saakashvili hozir uning uchun «reabilitatsiya»dan keyin o‘zini tiklab, «hujum»ga tayyorgarlik ko‘rish muhim ekanini aytgan.

«Nima qilishmasin, men ulardan zarracha qo‘rqmayman. Aksincha, kurashda quvonchim, g‘alabaga ishonchim ortib bormoqda. Mendan xavotir olmang! Endi asosiysi birdamlik va hal qiluvchi hujumga tayyorgarlik. Hademay bu hujumning vaqti keladi. Men esa ‘reabilitatsiya’dan olingan kuzirlarni tez orada tiklayman va ko‘proq kuchga to‘laman. Ammo hozir ham juda dovyurak va nekbinman», — deb yozgan Gruziyaning sobiq prezidenti.

30 dekabrga o‘tar kechasi Gruziya sobiq prezidenti Mixail Saakashvili jismoniy qarshilik ko‘rsatganiga qaramay, «kuch bilan» mamlakat Mudofaa vazirligi gospitalidan alohida mahbuslar uchun mo‘ljallangan Rustavi shahridagi maxsus hibsxonaga ko‘chirilgani xabar qilingandi.

Eslatib o‘tamiz, 19 noyabr kuni 49 kundan beri ochlik saqlab kelayotgan Saakashvili advokati bilan uchrashuv vaqtida yiqilib tushib, hushidan ketgan. Yiqilgach, u ko‘zini ochmagan va hech narsani sezmagan. Saakashvilini «nosilka»da olib ketishgan. U qamoqxona shifoxonasining jonlantirish bo‘limiga yotqizilgan. Keyinroq Saakashvili Gori shahridagi harbiy gospitalga ko‘chirilgan.

Mixail Saakashvili 1 oktabr kuni sakkiz yildan buyon birinchi marta Gruziyaga kelgandi. U chegarani noqonuniy kesib o‘tganlik ayblovi bilan qo‘lga olindi. Shundan keyin Gruziyada muxolifat norozilik namoyishlari boshlandi, ular Saakashvili ozod etilishini talab qildi. “Zamin” yangiliklarini “Vkontakti”da kuzatib boring