Migratsiya agentligi xorijdagi o‘zbekistonliklarga murojaat qildi

O‘zbekiston Respublikasining Migratsiya agentligi xorijda yashayotgan o‘zbekistonliklarga murojaat qilib, tashqi davlatlarda qurolli to‘qnashuvlarga aralashishning jinoyat javobgarligini eslatdi, deb yozmoqda Nova24 nashri.

Agentlikning xabariga ko‘ra, ayrim davlatlarda migrantlarni jangovar harakatlarga jalb qilish holatlari ko‘paygan. Bu esa fuqaroning hayoti, erkinligi va kelajagiga jiddiy xavf soladi. Shuningdek, agentlik o‘zbekistonliklarga quyidagi qat'iy taqiqlarga rioya qilishni maslahat berdi:

• Qurolli to‘qnashuvlar va jangovar harakatlar hududlariga yaqinlashmaslik;

• Harbiy operatsiyalarda ishtirok etmaslik;

• Tashqi davlatlarning qurolli kuchlariga, xavfsizlik xizmatlariga, harbiy adliya yoki boshqa kuch strukturalariga qo‘shilmaslik;

• Shubhali shaxslar, guruhlar yoki tashkilotlarning yollash takliflariga rozi bo‘lmaslik.

Shuningdek, O‘zbekiston Jinoyat kodeksining 154-1-moddasiga ko‘ra, O‘zbekiston fuqarosining tashqi davlatning harbiy xizmatiga, xavfsizlik organlari yoki politsiya xizmatlariga kirishi, shuningdek, yollash takliflarini qabul qilish jarimaga tortilishi yoki uch yilgacha tuzatish ishlari bilan jazolanadi. Yollash holatlarida esa, o‘zbekistonliklarga uch yildan besh yilgacha ozodlikdan mahrum etish yoki erkinlikni cheklash jazosi berilishi mumkin.

Bundan tashqari, shubhali takliflar yoki vaziyatlarda, o‘zbekistonliklarga Migratsiya agentligi, O‘zbekistonning diplomatik vakolatxonalari yoki konsulliklariga tezda murojaat qilish tavsiya qilindi.