Namangan viloyatida yuraklarni titratgan mudhish yo‘l-transport hodisasi ro‘y berdi. Chortoq va Uychi bekatlari orasidagi qo‘riqlanmagan temiryo‘l kesishmasida poyezd yengil avtomashinaga borib urildi. Bu haqda “O‘zbekiston temir yo‘llari” AJ rasmiy ravishda ma’lumot tarqatdi.
Ma’lum qilinishicha, Gentra rusumli avtomobil haydovchisi yo‘l harakati qoidalarini qo‘pol ravishda buzgan holda, yaqinlashib kelayotgan poyezd oldidan kesib o‘tishga harakat qilgan. Avtomobil salonida besh ayol va bir bola bo‘lgan. Kuchli to‘qnashuv oqibatida mashinadagi barcha yo‘lovchilar halok bo‘ldi.
Poyezd haydovchilari avariyani oldini olish maqsadida shoshilinch tormoz bosishgan, ammo yuksak tezlikda harakatlanayotgan poyezdni to‘xtatish imkoni bo‘lmagan. Hodisa natijasida poyezdga faqat yengilgina texnik zarar yetgan.
Mahalliy aholi va ijtimoiy tarmoq foydalanuvchilari bu qo‘pol qonunbuzarlikning fojiali oqibati yuzasidan chuqur qayg‘u bilan fikr bildirishmoqda. Mutaxassislar esa yana bir bor yo‘l harakati xavfsizligi qoidalariga qat’iy amal qilish zarurligini, ayniqsa, temiryo‘l kesishmalaridan o‘tarda eng oliy darajada ehtiyotkorlik talab qilinishini uqtirmoqda.
Fojianing tafsilotlari o‘rganilmoqda. Hozirda tegishli idoralar tomonidan tergovga qadar tekshiruv ishlari olib borilmoqda.
“Zamin”ni Telegramʻda oʻqing!
