Samarqand viloyatida noqonuniy kumush savdosi bilan shug‘ullangan shaxslar faoliyati to‘xtatildi, deb xabar berdi idoralar manbalari.
Davlat xavfsizlik xizmati Samarqand viloyati boshqarmasi xodimlari Narpay tumanida o‘tkazgan tezkor tadbir davomida Navoiy viloyatida yashovchi uch nafar shaxs — 1980, 1983 va 1987 yillarda tug‘ilgan fuqarolar — “shartli xaridor”ga 18 kilogramm kumushni 21 ming dollarga sotish paytida jinoyat ustida qo‘lga olindi.
Iqtisodiyot va moliya vazirligi huzuridagi Asillik darajasi nazorati inspeksiyasi xulosasiga ko‘ra, ushbu metallning sof og‘irligi 16 kilogramm 744 gramm bo‘lib, “999” asillik darajasiga ega. Uning umumiy bahosi 502 million so‘mdan ziyod deb baholangan.
Hozirda mazkur shaxslarga nisbatan Jinoyat kodeksining 177-moddasi 4-qismi “a” bandi bo‘yicha jinoyat ishi qo‘zg‘atilgan. Tergov harakatlari davom etmoqda, kumushning kelib chiqish manbasi o‘rganilmoqda.
Mahalliy manbalarning ta’kidlashicha, oxirgi oylarda qimmatbaho metallar bilan bog‘liq noqonuniy operatsiyalar soni ortib, huquqni muhofaza qiluvchi organlar nazorati kuchaytirilgan.
“Zamin”ni Telegramʻda oʻqing!
