Poytaxtda uy-joy ijarasi bilan bog‘liq hayratlanarli holat aniqlandi, deb xabar berdi Davlat soliq qo‘mitasi.
Ma’lumotlarga ko‘ra, “E-ijara” elektron tizimi orqali o‘tkazilgan monitoring natijasida 24 kvadrat metrlik xonadonga 35 nafar fuqaro ro‘yxatga qo‘yilgani ma’lum bo‘ldi. Hisoblab ko‘rilganda, har bir kishi ulushiga atigi 0,7 kvadrat metr maydon to‘g‘ri kelgan — bu hatto kichik yozuv stoli maydonidan ham oz.
Tahlilda uy egasi ikki nafar talabaga rasmiy ijara shartnomasi tuzib, har biriga 0,5 kvadrat metrdan joy ajratgani va oyiga 1,5 million so‘mdan ijara puli olgani aniqlangan. Keyinroq bu manzilda yana 33 kishi qo‘shimcha ro‘yxatdan o‘tkazilgan.
Soliq idorasi bir kishi uchun belgilangan minimal yashash maydoni 16 kvadrat metr ekanini eslatib, uy-joyni ijaraga berishda normalarga rioya etish zarurligini qayd etdi. Shu bilan birga, ijarachilar uchun munosib va insonga xos sharoit yaratish talab etilishi ta’kidlandi.
Mutaxassislar bu holatni uy bozoridagi muammolar va nazorat yetishmasligining yaqqol misoli sifatida baholamoqda.
“Zamin”ni Telegramʻda oʻqing!
