Yaqin Sharq davlatlaridan O‘zbekiston fuqarolarini olib chiqish ishlari davom etmoqda. Tashqi ishlar vazirligi matbuot xizmati ma’lum qilishicha, 5 mart kuni evakuatsiya qilinganlar soni 9361 nafarga yetgan.
Qayd etilishicha, 1 martdan 5 mart soat 10:00 holatiga qadar Saudiya Arabistonidan muntazam va qo‘shimcha charter reyslar orqali 8114 nafar O‘zbekiston fuqarosi Vatanga qaytarilgan. Birlashgan Arab Amirliklaridan 1192 nafar fuqaro olib kelingan, Erondan 23 nafar, Bahrayndan 25 nafar, Ummondan 7 nafar o‘zbekistonlik xavfsiz tarzda yetkazilgan.
TIVga ko‘ra, fuqarolarni qaytarish bo‘yicha chora-tadbirlar tizimli va bosqichma-bosqich amalga oshirilmoqda. Hozircha evakuatsiya asosan fuqarolik aviatsiyasi uchun havo hududi ochiq bo‘lib turgan davlatlardan tashkil etilgan, boshqa mamlakatlarda havo hududi ochilishi bilan jarayon tezkor davom ettirilishi aytilgan.
Vazirlik fuqarolarni xotirjamlikni saqlashga, sarosimaga berilmaslikka va vazmin harakat qilishga chaqirgan. Shuningdek, xorijda bo‘lib turgan vatandoshlardan mahalliy qoidalarga qat’iy rioya etish, axborot masalasida esa faqat O‘zbekiston davlat organlari va diplomatik vakolatxonalari tarqatayotgan rasmiy ma’lumotlarga amal qilish so‘ralgan.
“Zamin”ni Telegramʻda oʻqing!
