Farmatsevtika tarmog‘ini rivojlantirish agentligi direktori Abdulla Azizov Qobul shahriga xizmat safari doirasida Afg‘oniston sanoat va savdo vaziri Nuriddin Aziziy bilan rasmiy uchrashuv o‘tkazdi. Uchrashuvda ikki tomonlama savdo-iqtisodiy aloqalarning mustahkamlanishi va farmatsevtika sohasidagi hamkorlikni kengaytirish masalalari muhokama qilindi.
Uchrashuv chog‘ida O‘zbekistonning farmatsevtika mahsulotlari yuqori sifat va raqobatbardoshligi bilan ajralib turadi, bu esa ikki davlat o‘rtasida farmatsevtika savdosini 500 mln AQSH dollariga yetkazishni ustuvor vazifa sifatida belgilashga asos bo‘lgani taʼkidlandi.
Mazkur maqsadga erishish uchun qo‘shma operativ ishchi guruh tashkil etish muhimligi alohida taʼkidlandi. Jumladan, Afg‘onistonda Good Distribution Practice (GDP) standartlari asosida hamkorlikni rivojlantirish, shuningdek yirik distribyutorlar bilan to‘g‘ridan-to‘g‘ri hamkorlikni yo‘lga qo‘yish kabi takliflar ilgari surildi.
Tomonlar texnik ishchi guruh tuzish, axborot almashuvini faollashtirish va yaqin istiqbolda ikki tomonlama hamkorlik bo‘yicha shartnomalarni rasmiylashtirish zarurligini ham qo‘shimcha ravishda qayd etishdi. Bu tashabbuslar farmatsevtika bozorida strategik manfaatlarni taʼminlash va sohadagi investitsiyalarni kengaytirish uchun muhim qadam sifatida baholanmoqda.
Uchrashuv yakunlari ikki davlat farmatsevtika sanoatlari o‘rtasida hamkorlikni mustahkamlash, mahsulotlar sifatini oshirish va xalqaro standartlarga muvofiq tarmoqlarni rivojlantirishda muhim ahamiyatga ega bo‘lishi kutilmoqda.
“Zamin”ni Telegramʻda oʻqing!
